Grand Slam an khel leh thei ta Djokovic thiam dan a la pangngai

Beiseina meichher chu mit loa an vawn nun reng avangin a rawn alh chhuak leh ta. Thla ruk chhung Grand Slam inelna khelh a nih loh hnuah US Open an khel thei a, nimin zinga inlan world number 1 Novak Djokovic-a'n a thiam a la theihnghilh lo.

Djokovic-a'n US Open-ah a vawi li nan hlawhtlin a tum a, player ropui Roger Federer leh Rafael Nadal te awm loh hlanin major title 18-na lak a tum bawk - player nazawng tan dan chi a ni lo. Serbian tlangval hian a match hmasa berah Damir Dzumhur chu 6-1, 6-4, 6-1 in a sawp.

US Open vawi thum champion tawh Djokovic hian second round-ah chuan Kyle Edmund a hmachhawn leh dawn. British number 2 hian inkhel dangah Alexander Bublik chu 2-6, 7-5, 7-5, 6-0 in a lo hneh ve thung a ni.

Season dang ang chu ni se Flushing Meadows, New York-ah khawvel hmun hrang hrang aṭangin tennis ngainatu an fuan khawm leh ang. Mahse Covid-19 vangin Arthur Ashe Stadium-ah fans an lut thei lo a, inkhel hmuhnawm viau mah se a boruak 'hot' ang kha a awm meuh lo.

Seeded pakhatna Djokovic-a'n minute 24 chhung lekin set khatna a la a, set hnihnaah a service vawi khat hloh ve zauh mah se a buai chhunzawm lo. Darkar khat leh minute 58 chhungin a chak fel hman, hnehna chang turin a khingpui service vawi sarih ngawt a chhuhsak.

Djokovic chuan, "A bul kan ṭan fuhin ka khel ṭha thawkhat pawhin ka hria. Chutihrualin rilruin thil dang a ngaihtuah chang a awm, tennis kan khelh leh theih vangin ka lawm a, court chhungah boruak dang lo ngaihtuah palh kha thil awm thei tak a ni," a ti. 

Season kal laiah match an la khel tam lo, world number 1 hian match 24 a khelh tawhah hnehna a la chang vek. Australian Open, Dubai Tennis Championship leh Western and Southern Open-ah te a hlawhtling tawh, ani aia khel ṭha tluang an awm lo.

Player beiseiawm leh theihna nei sang, mahse inelna liana hlawhtling hlei thei lo Alexander Zverev-a'n a match hmasa berah Kevin Anderson a hmachhawn a, chetsual nghal theihna a ni. German tlangval hian darkar thum leh minute sarih chhungin 7-6 (7-2), 5-7, 6-3, 7-5 in hnehna a chang hram.

Kum 23 mi Zverev chuan, "Kevin hi tumahin first round-a hmachhawn atan an duh lo ang, ani ang player ṭha leh service nei ṭha bik ka paltlang thei hi ka lawm," a ti. South African star hian vawi 20 ngawt aces siam mah se a chak pui zo ta chuang lo a ni.

Inkhel dangah Stefanos Tsitsipas a hmuhnawm. Greek tlangval huaisen hian Albert Ramos Vinolas chu 6-2, 6-1, 6-1 in a hneh. Spanish player Vinolas hian inbuatsaihna nei loin US Open a khel a, hri leng vanga a chawlh rei avangin beisei a phak lo.

Kum 22 mi, world number 6 ni bawk Tsitsipas hian a match lehpekah chuan tualchhung player Maxime Cressy a hmachhawn dawn. Seeded pangana Zverev pawhin US rawlthar Brandon Nakashima a hmachhawn zui ve leh ang.

Thawhṭanni zan aṭangin US Open khelh ṭan a ni a, player langsar an chak deuh vek laiin seeded pakuana Diego Schwartzman erawh hming langsar lo Cameron Norrie lakah a chak lo nghal - rinkai zinga chak lo hmasa ber a ni.

Britain tlangval Norrie hi world ranking-ah pawh 76-na daih a ni a, chak tura rinkai a ni lo - set hmasa pahnih a hloh nghal avangin chiang taka chak lo tur niin a lang hman, mahse inkhel a la zo lo a, engmah a la chiang lo.

Norrie hian huaisen taka bei letin set hnuhnung pathum a la, darkar thum leh minute 59 chhungin 3-6, 4-6, 6-2, 6-1, 7-5 in hnehna a chang let daih! Norrie hian a match lehpekah chuan Schwartzman ang bawkah Argentine player Federico Coria a hmachhawn leh ang.

Inkhel dangah erawh chak tura rinkai Denis Shapovalov chuan wildcard hmanga inlan Sebastian Korda chu 6-4, 4-6, 6-3, 6-2 in a hneh. Service nei ṭha chungchuang John Isner pawhin vawi 52 ngawt mai aces vaw chhuak chungin Steve Johnson 6-7(5), 6-3, 6-7(5), 6-3, 7-6(3) in a hneh ve bawk.