Zaninah Madrid Derby - Mipui ngaihven Torres?
Atletico Madrid-ah Fernando Torres a kir a, Vicente Calderon-ah mipui 45,000 in an lawm a. Zanin dar 1:30 hian an phochhuahna stadium-ah Real Madrid an hmachhawn dawn - Torres vang hian Madrid Derby-in ngaihven a hlawh hle.
Fapa tlanbo chu
Torres hi Atletico fapa rangkachak a ni ṭhin. A naupan laiin keeper-in bul a ṭan a, a hnuah erawh striker-ah a insawn a, Rayo tana a khelh laiin season khatah goal 55 a khung a. Atletico tana khelh theihna hun ṭha a nei a, kum 1995 khan kum 11 leka upa a nihin Atletico youth system a zawm.
Torres hian kum 17-a upa a nihin Atletico Madrid tan a khel ṭan a, kum 19 a nihin club captain a ni. Liverpool a pan hma khan Torres hian Atletico tan match 214 a khel a, goal 82 a khung. Liverpool-ah ropui taka a khelh hnuah Chelsea leh AC Milan-ah beisei a pha lo a, chuti chung chuan Atletico-ah chuan hero a la ni reng. A phochhuahna huna mipui pungkhawm khan hero a nihzia chu a nemnghet.
Atletico Madrid boss Diego Simeone chuan zanina Real Madrid nen an inkhelh hunah Torres a chhawr dawn leh dawn loh a la tichiang lo a, training-naa a chet ṭhat dan a zira a luh tir tur thu a sawi.
Thlirlawkna
Torres hi awm ta lo reng pawh ni se La Liga champion Atletico leh Copa del Rey champion Real Madrid inkhel tur chu Spanish football tingaihnawmtu chu a ni a hrim hrim.
Real Madrid hian a zawna vawi 22 an chak zawn hnuah Valencia an hneh lo a, an phur lai ber a ni lo. Chutihrualin Real hi season liamtaa Copa del Rey aṭanga Atletico hnawhchhuaktu an ni a, Copa del Rey-ah a zawnin vawi 10 an chak tawh bawk.
Real innghahna Cristiano Ronaldo-a'n goal a la khung chhunzawm zel a, Valencia laka an tlawm ṭum pawhin a pet goal. Valencia lama a goal vang hian Ronaldo hian Real player zinga khualmuala goal khung tam ber a ni. Portugal captain hian match 91-ah goal 88 a khung a, Raul record a khum chiah. Real player ropui pahnih hi anni ang bawka ropui Di Stefano (71) leh Hugo Sánchez (70) te'n an dawt.
Real tan Ronaldo a vul a; ani bakah hian football hmuhnawm khel turin Karim Benzema, Toni Kroos, James Rodriguez leh Gareth Bale te an la kawl. Heng player ṭha rual enkawltu hi Italian manager tawnhriat nei ṭha Carlo Ancelotti a ni.
Chutihrualin Atletico manager Diego Simeone hi zam mai chi an ni lo. Season ṭan nana inelna Supercopa de Espana-ah Atletico hian Real Madrid hi 2-1 in an hneh a, Argentine manager hian inkhelh banah, "Season tluan chuan Real Madrid leh Barcelona te hi kan elpui thei lo ang, amaherawhchu match hnih khat lekah chuan kan hneh thei," tiin a sawi.
Tuna Copa del Rey-a an inkhelhna tur hi match hnih khat a tih ang chi chu a ni a, chak tur a hriat loh. French forward Antoine Griezmann a che ṭha a, match hnih lekah goal nga a khung. Mario Mandzukic an nei a, Torres an neih belh leh bawk. Atletico tlar hma an ngaihtuah awm lo a, amaherawhchu defender Miranda dinhmun a chian loh avangin tlar hnung erawh a ngaihtuahawm thung.
Copa del Rey - Round of 16 Fixtures
Nizan lama Inkhel
Celta de Vigo 9:30 PM Athletic Bilbao
Malaga 11:30 PM Levante
Zanin Inkhel Tur
Villarreal 12:30 AM Real Sociedad
Atletico Madrid 1:30 AM Real Madrid
Valencia 2:30 AM Espanyol
Almeria 2:30 AM Getafe
January 8, Ningani Zan
Granada 12:30 AM Sevilla
Barcelona 2:30 AM Elche
Second leg hi January 14 leh 16 inkar hian khelh leh tur a ni.