Milan beiseina tinungtu Cerci
Nizan khan AC Milan leh Sassuolo te inkhel result kan hre hman lo a, eng result pawh thleng se AC Milan-in kum 2015 bul an ṭan ṭha tho tho. A chhan chu an player awh em em leh an mamawh Italian winger Alessio Cerci an la lut.
Milan hian khawvel huapa player lar Fernando Torres chu Chelsea aṭangin an la nghet sauh sauh a, Atletico Madrid lamah loan-in an chhuah tir nghal. Torres an chhuah chhan hi Atletico Madrid midfielder Cerci an lak luh duh vang a ni.
Season liam ta khan Cerci hi Italian club Torino tan a khel a, goal 13 a khung bakah assist ṭum 13 neiin Torino hi Europa League khel thei dinhmunah a hlangkai. Cerci hi winger tlan chak a nih bakah a ke vei lam a hman thiam avangin awhtu a ngah a, chung zingah chuan Milan an tel. Milan joint-CEO Adriano Galliani chuan man tlawm zawka lak a tum lutukna lamah a player awh chu a Spanish champion Atletico Madrid lakah a chân a, Diego Simeone hote hian euro maktaduai 18-in Cerci hi an la lut daih. Thla ruk hnuah Milan an vannei a, an player awh em em khan Serie A che ṭha lo Torres nen an inthleng.
Cerci loan hunchhung hi a rei a, thla 18 atan a ni. Chuvangin, Filippo Inzaghi-a'n Milan tana a a hma thlirah Cerci hi a tel thei dawn a - Jeremy Menez, Giacomo Bonaventura leh Stephan El Shaarawy te nena an inkawp tur chu eng team tan pawh dan huphurhawm tak tur a ni.
Milan hian point 25 hmuin table-ah pasarihna an ni mek a, season tharah Champions League khelh ngei an tum. Nizan lama Sassuolo an khelh pui zawh hian Atalanta leh Lazio an hmachhawn dawn a, February thlaah champion lai leh hmahruaitu Juventus an khelhpui leh bawk ang.