Blatter elpui tur Al Hussein

Jordan prince Ali Bin Al Hussein chuan Thawhlehni khan FIFA President a chuh tur thu a sawi a, May thla tawpa Zurich-a FIFA inkhawmpui lian vawi 65-naah president ni lai Sepp Blatter-a'n elpui tur a nei dawn tihna a ni.

FIFA vice president ni lai Al Hussein hi football kalhmang thlak danglam­tu pawimawh a ngaih a ni a, a thutlukna hian inthlan tur boruak a tih nun sawt rin a ni.

Ali Hussein chuan, "President ka nih duh chhan hi eng dang vang a ni lo, football enkawl lama FIFA hmingchhiatna tihreh ka duh a, infiamna chhunga hruai luh leh ka duh a ni. Thutlukna siam harsa tak a ni a, he thutlukna ka siam hmaa hian uluk taka ka ngaihtuah bakah FIFA lama ka thawhpuite ka rawn bawk," a ti.

Jordan Football Association president chuan, "Khawvel football hian kaihruaitu pawl lang tlang, entawn tlak leh fel fai a mamawh a. FIFA ni loin football hian khawvel a deng chhuak tur a ni," tiin a sawi.