Sik leh sa tihbuai theih loh 2015 Australian Open
Australia-ah chuan January chho hi nipui a nih avangin Tennis player-te tan nisa hnuaia khelh a harsa hle a, inkhel boruak a hmuhnawm tur ang a pha lo ṭhin. Player-te harsatna sukiang tur hian kum tin outdoor-a khelh ṭhin Australian Open chu kuminah tournament pumpui 'retractable roof' hnuaiah zawh theihin stadium pathumte peih fel a ni ta. Melbourne, Australia-ah a vawi 103 nan January 29 aṭanga February 1 chhung Australian Open tournament hi khelh a ni ang.
Enge 'retractable roof'
Indoor han tih hian stadium te sak pum an ni lem lo a. 'Retractable roof' an tih chu vuah niin duh hunah reilote a stadium khuh leh hawn mai thei hmanraw changkang tak a ni.
Tournament hi kum 1988 aṭangin hard court a khelh ṭhin a ni a. Rod Laver Arena leh Hisense Arena-ah te hian 'retractable roof' dah an lo ni tawh a. Grand Slam event a tournament hrang hrang pali zinga roof hmang hmasa ber record an siam nghe nghe a ni. Kuminah a ṭum thumna atan Margaret Court Arena-ah retractable roof hi vuah thar a ni bawk.
Tennis Australia Chief Executive Officer Craig Tiley chuan,"Nikum tournament-ah khan khaw lumin 40C a pelh thleng a game kan tihtawp loh avangin nasa takin sawiselna kan tawk a ni," a ti. Nisa mai ni lo, ruahsur thlenga veng thei system changkang vuah chungchangah, "Grand Slam a 'retractable roof' stadium pathum a vuah hmasa ber kan ni hi ropui ka ti a. Tin, a khawl thawh dan hmun dang zawng aiin a rang ber a. Inkhelh chawlh lailawk te te ngai loin, he system hi minute nga chhung lek a inhawngin a inkhar leh hman vek a ni," Craig chuan a ti.
Nikumah second set, first round khelh laiin Canadian player Frank Dancevic chu khawlum vangin nikhaw hre loin a tlu a.
French player Tsonga pawhin a pheikhawk chu court chhuatah a inchar titih a ni ber e, a ti. Danish star Caroline Wozniacki phei chuan a tui in tur bottle chawpin a tuiral ṭep tih a sawi!
Grand Slam tournament zingah Wimbledon hian roof an nei a. U.S. Open official-ten kum 2018 ah an stadium pahniha vuah an tum thu an lo sawi tawh a ni. French Open chuan a hun tur sawi awm lo mah se an main stadium-ah vuah ngei an tum bawk a ni.
Australian Open bihchianna
Lawn Tennis Association of Australia (LTAA)tih chu Tennis Australia tia thlakin an ni hian Australia Open an buatsaih ṭhin a. Tennis-ah hian kum tin Grand Slam Event awmin a hnuaiah Australian Open bakah hian French Open, Wimbledon leh US Open te khelh ṭhin a ni.
Kum 1905 a ṭan tawh Australian Open hi inkhel entu mipui ngah lamah US Open dawt chiah a ni. Grand Slam event pali zingah khawlum leh ruahsur laia inkhel tikhaihlak lo tur 'retractable roof' Stadium hmang hmasa ber an ni bawk.
Kumin hian 10% in prize money pun niin a belhkhawm hi Australian dollar in 36,300,000 lai a ni. October ni li kum 2011 khan tournament director chuan 2012 Australia Open atan prize money chu Australian dollar 26,000,000 a pun a ni tih a sawi a. Chumi hun laia khawvel tennis tournament zingah prize money sang ber record a siam hial a, a kum tela belh zel a nih tur thu a sawi a ni.
2015 Australian Open, tournament kum 100 chuang lo khelh tawhah player ropui tak takte an inlan leh dawn a. Category hrang hranga champion turte an inrinsiak ṭan mek a ni.
2014 Australian Open Champion-te
Men's Singles: Stanislas Wawrinka
Women's Singles: Li Na
Men's Doubles: Lukasz Kubot / Robert Lindstedt
Women's Doubles: Sara Errani / Roberta Vinci
Mixed Doubles: Kristina Mladenovic / Daniel Nestor