Barcelona chhungkua an buai

Pathianni zan khan La Liga-ah Barcelona-in Real Sociedad an hneh lo a. Thawhṭanni khan sporting director Andoni Zubizarreta chu ban a ni a, a assistant Carles Puyol a chawl zui bawk. Hei chauh hi a ni lo - an thiampuipa Lionel Messi-a'n pum na chhuanlamin practice a zawm lo. Head coach Luis Enrique dinhmun a derthawng a, vawiin hian emergency board meeting neih a ni dawn.

Director football aṭanga ban tak kum 53-a upa Andoni Zubizarreta hi Barcelona keeper hlui a ni. Kum 1986 leh 1994 inkar khan Spanish club lian tan hian a khel a, Spain tan pawh vawi 126 zet a inlan hman.

Kum 2010 khan Manchester City director of football hna chelh ta Txiki Begiristain hmun ruak a hnawh khat ṭan a, transfer-ah a chetsual avangin a hna a chan phah ta a ni.

Assistant sports director aṭanga an ban tak Carlos Puyol hi Barca captain hlui a ni a, Champions League-ah Barca hi ṭum thum champion puiin nikum nipui khan football khelh a chawlhsan.

Puyol chuan, "Tun thla thum leh a chanve chhung hian Barcelona hmel dang zawk hmuh theihna hun ka nei a. Tunah chuan mimal leh hnathawh kawngah hmasawnna neih ka mamawh. Ka hun tawn ropui zawng zawng min thlen tirtu Barcelona-ah hian kir leh ngei ka duh a, he club tan hian bat nasa tak ka nei a, rulh ngei ka duh a ni," a ti.

Buaina chu

Barcelona hian dan phal loh anga kum tling lo (Under 18) player an lak luh avangin FIFA chuan kum khat chhung transfer-ah player lak luh a khap sak a. Barca hian beiseina sang tak nen infiamna lama thuneitu sang ber Court of Arbitration for Sport-ah an zual ko a, mah se an hlawhchham.

Cas hian FIFA thutlukna chu pawm puiin Barcelona hian kum 2015 chhungin player an la lut thei dawn lo. Player lak luh kawnga an chetsual vang hian Barca president Josep Maria Bartomeu chuan Zubizarreta contract hi a tihtawp sak ta a ni.

Barca hian vanneihna an nei tho a, Cas laka an zualko zarah nikum nipui transfer khan player an la lut thei a, euro maktaduai 117.5 zet an hmang.

Catalan club hian Luiz Suarez bakah Ivan Rakitic, Marc-Andre ter Stegen, Thomas Vermaelen, Claudio Bravo, Jeremy Mathieu leh Alen Halilovic te an la lut. Chutihrualin tun dinhmunah beisei ang result an hmu thei lo a, player thar pawh an lak belh thei tawh dawn lo a ni.