"Padma Award dil turin enge ka nih" - Saina Nehwal

Indian Badminton star Saina Nehwal chu tunhnaiah media-in Padma Bhushan Award duh luatah award dawn dil hial angin an chhuah a. He thu hi Saina chuan thu belhchian dawl lo a ni tiin award dawn a dil lo tih a sawi.

Padma Bhushan Award dawng tur nominate tihchhuahah Saina chuan a hming telh a nih loh chhan zawtin, a hnuah award dawn dil ta angin an lo chhuah si a ni.

Saina Nehwal chuan, "Media-ten ka chanchin an chhuah danah ka lungawi lo takzet. Padma Award dil turin enge ka nih. Infiammi ka ni a, ka ram tan theihtawp ka chhuah ṭhin. Ka zawhna neih chu nominate list-a ka hming tel loh chhan mai a ni. Thuneitute thutlukna chu engpawhnise ka zah em em ang," a ti a.

Olympic medallist Sushil Kumar chu award dawng tur nominate list-ah telin, Saina nen an inkar a khi awm phah hial awmin sawi an awm bawk. Saina chuan Sushil Kumar nen an inkar a fel a, an inbiak fo bakah a ṭhian ṭha a ni tih a sawi. "Sushil hian Padma Bhushan a dawng a nih chuan ka lawmpui hle ang," a ti bawk.

Sorkar dan siamah Padma award hi mi pakhatin kum 5 chhungin vawikhat aia tam a dawng thiang lo a. Sushil Kumar hian 2011 khan Padma Shri Award dawng tawhin, 2016 hma chu award dawng lo tur ni mah se sorkar chuan a phute chu an pek tho tur thu an sawi.