US Open leh Covid-19

Coronavirus vangin infiamna khawvel a buai a, tennis pawh a bang bik lo. January thla khan Australian Open khelh a ni a, Melbourne Park-a inelna hi hri lengin a la tibuai hman lo - Novak Djokovic a champion.

February thla aṭangin hri lengin tennis a tibuai ṭan a, March thla aṭang chuan mipa leh hmeichhe inelna zawng zawng chawlh lailawk vek a ni. May thlaa khelh tur French Open chu September thla chawhhnu lama khelh tur hian sawi a ni.

Indopui pahnihna hnua a vawi khat nan Wimbledon meuh pawh ṭhulh a ni - grass court season an hmang lo tawp. New York khawpuiah hri kai an tam a, infiammi leh US Open buatsaihtu lam pawh an lu a hai takzet.

Buaina leh harsatna nasa tak karah United Tennis Association an dingnghet tlat a, duhthlan tur dang an neih loh avangin a hmuna entu awm loin tournament an buatsaih a, lawmman an sem tur pawh an tihniam hret; season dang ang chu ni se nikum aiin a pung leh zawk ang.

Player inhnukdawk leh inlan tum lo hrim hrim awm nual mah se a langsar inlan an tam tho a, world number 1 Djokovic-a'n a lo sawi tawh angin tennis tan hrim hrim pawh US Open khelh hi a ṭha.