Ben Arfa-a'n Nice a zawm

Newcastle manager chhuak ta Alan Pardew khan French midfielder Hatem Ben Arfa tan Newcastle United-ah hmun a awm tawh loh thu a sawi kha a takin a thleng ta. Club leh player-te remtihnain an pahnih inkara contract chu tih tawp a ni a, kum 27-a upa Ben Arfa hian Thawhṭanni khan medical a paltlang a, Ligue 1 club Nice a zawm.

Ben Arfa hian professional match hmasa ber Lyon tana a khel ṭumin Nice hi a hmachhawn a, Claude Puel-a enkawl Nice zawm tur hian a inngaihtuah rei loh thu a sawi. Ben Arfa chuan, "Real Madrid pawhin min rawn se Nice hi ka zawm a, helai hmunah hian nuam ti taka khelh ka duh. Manager Claude Puel nen kan inbia a, a ṭawngkam hman dan aṭangin ka ngaina nghal," tiin a khelhna tura a lungawi thu a sawi.

January 2011 khan Ben Arfa hian Marseille aṭangin Newcastle a zawm a. Tun season ṭan tirh khan Hull City-ah season khat chhung loan-in a chhuak a, amaherawhchu beisei ang a phak loh avangin a loan hun chhung hi tih tawi a ni.

Ben Arfa khelhna tur Nice hi Ligue 1 table-ah 11-na an ni mek.