FA Cup Draw Anfield-ah Emile Heskey a kir dawn

Thawhṭanni zan khan FA Cup fourth round draw neih a ni a, Premier League club te'n khingpui lian tham an nei lo. Fourth round hi January 24 leh 25-ah khelh a ni ang.

Wimbledon hnehtu Liverpool hian Championship club Bolton Wanderers an hmachhawn dawn. Bolton hi Liverpool striker hlui Emile Heskey khelhna a ni a, Liverpool star hlui hi kum 36 a upa a ni tawh a, player pawimawh a ni pha tawh lo. Amaherawhchu, Anfield-ah chuan Bolton player zingah lawm a hlawh ber ang.

Champion lai Arsenal-in Amex Stadium-ah Championship club Brighton & Hove Albion an hmachhawn dawn a ni. Nikum January thla khan FA Cup fifth round-ah Brighton leh Arsenal te hi an inhmachhawn tawh a, Olivier Giroud goal hnih leh Theo Walcott te goal hmangin Arsenal an chak.

FA Cup tiropuitu chu seeded team an awm lo hi a ni a, club tenau tan chuan club lian tum hi malsawmna a ni. Cambridge United-in an khelmual Abbey Stadium-ah Manchester United an hmachhawn dawn lo a, League Two club tan draw lawmawm tak a ni.

Abbey Stadium-ah mipui 9,617 an leng a, ṭhutna awm zat erawh 4,948 chauh a ni. Heng ṭhutnate hi Manchester United-in an tlawh hunah chuan a khat vek ang. Cambridge-ah hian United player hlui Luke Chadwick a khel a, English midfielder hian nikum khan MK Dons aṭangin Cambridge hi a zawm a ni. FA Cup khelh meka dinhmun hniam ber chu Cambridge hi an ni a, tuna an league dihmun aṭanga thlir chuan United nena an inkarah hian club 79 an awm.

Cambridge United head coach Richard Money chuan, "Kan phur tawh khawp mai, hetiang dinhmun thlen theih chhan hi club hnuaia thawktute zawng zawng thawhrimna rah a ni," tiin a sawi.

Kum 1991 khan League Cup-ah club pahnih hi an inhmachhawn tawh a, United hi aggregate-in 4-1 in an chak.

Manchester City-in harsa takin Sheffield Wednesday an hneh a, fourth round-ah Middlesbrough an mikhual leh ang. Boro nena an inkhel hnuhnun ber ṭumin Benjani Mwaruwari goal hmangin City-in Riverside Stadium-ah hnehna an chang a, chutihrualin 2006-08 season tawp niah Boro hian City hi 8-1 in an sawp.

Crystal Palace-in coach thar Alan Pardew-a enkawlna hnuaiah Dover Athletic an hneh a, an hmachhawn leh tur a la chiang lo. Southampton leh Ipswich chak zawk zawk an tum dawn lo a, Saints an chak chuan Palace hmabak hi a awlsam lo ang.

FA Cup Fixtures

Southampton/Ipswich vs Crystal Palace

Cambridge United Vs Manchester United

Blackburn Rovers Vs Swansea City

Chelsea/Millwall Vs Bradford City

Derby County Vs Scunthorpe/ Chesterfield

Preston NE Vs Sheffield United

Birmingham City Vs West Brom

Aston Villa Vs AFC Bournemouth

Cardiff City Vs Reading

Liverpool Vs Bolton

Burnley/Tottenham Vs Leicester City

Brighton Vs Arsenal

Rochdale Vs Stoke City

Sunderland Vs Fulham/Wolves

Doncaster/Bristol City Vs Everton/West Ham

Manchester City Vs Middlesbrough