Sampdoria hnehtu Lazio pathumnaah

Thlasik chawlh hnua Serie A inkhel hmasa berah Felipe Anderson a langsar a, Lazio-in Sampdoria 3-0 a an hneh ṭumin Brazilian midfielder hian goal khat a khung bakah assist ṭum hnih a nei. Inkhelh ṭan hmain team pahnihin point 27 ve ve an hmu a, inkhelh banah Lazio-in point 30 hmuin pathumnaah an awm a, Sampdoria erawh panganaah an awm thung.

Inkhelh ṭan tirh phat aṭangin mualneitu Lazio-in bul an ṭan ṭha a, Stefan Radu-a'n a chance neih chu goal zawnah a pet lo a. Anderson-a freekick hlawhchhuah chu inhliam hnua rawn kir Lucas Biglia-a'n petin keeper Emiliano Viviano-a'n a dan sak. Hei chauh hi a ni lo Stefano Okaka goal khung chu dik lo takin offside vanga pawm a ni lo bawk.

Lazio an vanduai reng lo a, minute 38-naa vei lam aṭanga Anderson-a cross chu Marco Parolo-a'n goal a chantir a; minute thum hnuah a siam saktu Anderson hian ama pualin goal a khung leh bawk.

Second half-ah Lazio an chungnung chhunzawm a, minute 66-naah Ander­son-a'n player pathum a bum hnuah Filip Djordjevic thun turin a siam sak.

Hun tawp lamah Sampdoria-in Lazio keeper Federico Marchetti tan hna siam sak mah se goal an khung lo a, inkhel result a danglam phah lo bawk.

Sampdoria manager Sinisa Mihaj­lovic chuan, "Felipe Anderson kha Cristiano Ronaldo ang mai a ni. Amah tluk pha kha an awm lo a, chiang takin man of the match a ni. Sampdoria khelh ṭhat ber zan a ni lo a, Lazio khan chak an phu zawk a ni," tiin a sawi.