Liverpool damna Gerrard

Liverpool chhuahsan mai tur Steven Gerrard chu Liverpool chhandamtu a ni. Thawhṭan zana FA Cup third round-a AFC Wimbledon an hneh ṭumin Gerrard hian goal hnih a thun a, 2-1 in an chak hram.

Liverpool hian FA Cup-ah division palina club hi an la hneh lo ngai lo a, tun ṭum inkhel erawh an khel ṭha loin chak lo thei dinhmunah an awm hman a; nimahsela a lo tih fo ṭhin angin Gerrard chuan Liverpool a chhandam a, minute 62-naa a freekick chu an chakpui ta a ni.

Inkhel danglam

Liverpool-in an cap­tain an kawl hlen dawn lo tih an hriat hnua an inkhel vawi khatna a ni a, Liverpool fans tan hei hi inkhel danglam tak a ni lo thei lo.

Inkhel an ṭan a, Sean Rigg chuan rin loh takin Liverpool goal-ah a thun nghal teuh hle a, Liverpool tan a hlauhawm hman hle. Minute 12-na a ni a, Gerrard a lo lang ta Liverpool captain hian Javier Manquillo ball cross chu keeper James Shea dan hman lohin a tauh goal a, 1-0 a ni.

Liverpool hi an thlamuang rei lo a, tun season-a an tih fo angin anmahni tihsualah goal an chhuah leh. Liverpool goalkeeper Simon Mignolet chuan corner-a George Francomb ball pet chu a man lo a, hei hi an defender Mamadou Sakho chuan lo dangin an goal bar a tihper a, ball lo per lêt hi Adebayo Akinfenwa chuan minute 36-naah a thun a, half time-ah 1-1 a ni.

Second half ṭan hnuah Liverpool-in goal an chhuah leh teuh hle a, Adam Barrett-a goal thun tur chu Gerrard bawkin goal line bulah a lo dang hman. Liverpool-in tiphurtu an mamawh a, Gerrard a lo lang leh ta - USA lama pêm tum hian minute 62-naah freekick aṭangin a pet lut a, hei hi Liverpool tana a goal 182-na a ni a, chakna goal a ni zui.

Duhthusam a hnai?

May 30-ah FA Cup final an khel dawn. Hei hi Gerrard-a kum 35 piancham a ni. Liverpool hian tun season-ah champion nomawi an beisei a nih chuan FA Cup hi an hnaih theihna ber a ni mai thei a, Gerrard-a piancham leh amah thlahna inkhel ni bawk an khel thei ang em? Tunah FA Cup fourth round an la khel dawn chauh a, Liverpool fans duhthusam hi thleng thei tak maw?

Gerrard chuan, "Ka tan chuan a hnuhnung ber a ni zel tawh a, chuvangin a ṭangkai thei ang bera hman hi ka duh a ni," a ti a; kum 2005-a Champions League final-a 'thilmak' thlentirtu player hian a FA Cup khelh hnuhnung berah hian a hmangaih Liverpool hi champion nomawi lakpui thei tak ang maw?

Stevie G chuan, "FA Cup hi a nuam ka ti ṭhin a, tun hma aṭangin ka ngai hlu hle a ni. Ka khelh tawpna a ni dawn a, a tawp thlen ngei hi ka duhthusam a ni," tiin a sawi.

Eng nge an sawi?

Liverpool boss Brendan Rodgers chuan, "Bul kan ṭan ṭha a, inkhel pawh kan thunun viau a; nimahsela kan tisual leh ṭhin... inkhel hautak tak a ni a, Wimbledon an khel ṭha khawp mai," tiin a sawi.

Inkhel a hautak dan sawiin, "Tha­rumin min bei a, ball ṭha tak tak an vawrh luh ṭhin avangin dan an harsa a, ball hlauhawm tak tak an nei ṭhin a, hetiang inkhelah hi chuan hahdam taka awm theih a ni lo... ka player-te ka chhuang a, an huaisen ka ti a, dinhmun khirh takah an chak thei a ni," a ti.

AFC Wimbledon manager Neal Ardley chuan, "First half-ah kha chuan chance kan nei ṭha zawk a, a tawp lam minute 20 velah erawh kan che hleithei tawh lo. Ka naute ka chhuang a; nimahsela kan chak loh hi an lana tur a ni a, chak thei chunga kan chak lo hi chu an tuar tur a ni," a ti.