Inter-ah Podolski a hlim

Arsenal-a khel phak lo Lukas Podolski chuan Inter Milan a zawm fel ta a, Thawhṭanni khan training zawm nghalin a club thar nuam a tih thu a sawi.

Kum 29 mi Germany inter­national player hian tun season tawp thleng Inter-ah hian loan-in a khel dawn a, Inter lamin an duh chuan season tawpah an lei thei ang.

Inter chuan an player thar chu an chhawr nghal dawn tih an puang a, "Podolski hian number 11 a ha ang. Inter Milan leh Juventus inkhel tur squad-ah a tel nghal a, a zin chhuak nghal ang," an ti. Nizan lam khan Juve khelmualah Inter hi an zin chhuak a, Arsenal aṭanga an player hawh pawh hi an hruai tel nghal a ni.

Podolski chuan a chhuahsan tak Arsenal fans hnenah thu thawnin, "Ka chunga an thiltihte avangin Arsenal fans chungah ka lawm em em a, ka lawmzia hi thua sawi chhuah theih a ni lo. Ka thinlungah hmun pawimawh tak an luah reng tawh dawn a, Arsenal-a ka hun hmante kha a nuam ka tiin hriatreng tlak ka hnutchhiah ve ngei ka beisei a, kan la intawn leh ka beisei," a ti.

Colonge aṭanga Arsenal a zawm hnuah game 82 khelin goal 31 a thun a; nimahsela World Cup khela an chhuah hnuah Arsene Wenger-a'n a chhawr duh meuh tawh lo a, tun season-ah Premier League inkhel bul ṭantu zingah a lang lo a, substitute niin vawi sarih chu a tlan lut ve tawh. Podolski hian Arsenal bench-a ṭhut aia chhuah a duh zawk thu hi a sawi thawi zauh zauh tawh a, Italy lam a pan ta a ni.

Inter Milan-ah hian Man­chester City boss hlui Roberto Mancini hnuaiah a inkhel dawn a, England-a an khingpui ni ṭhin Man United defender hlui Nemanja Vidic nen team khatah an awm dawn a ni.

Hetihlai hian Serie A-a 11-na ni mek Inter hian player lei belh an la tum zel a, Mancini chuan, "A sira tlan tur player pahnih kan mamawh a, pakhat chu Podolski hi a ni. Kum 29 a ni a, tawnhriat a ngah tawh a, kan ṭangkaipui ngei ka beisei. Pakhat dang chu Xherdan Shaqiri a ni a, Bayern Munich player ni a, a la naupang a, nakin zela player ṭha tak ni thei tur a ni," a ti. Xherdan Shaqiri lei tuma an beih thu hi a pha lo.