David Silva: Tuin nge a hmun ruak luah dawn?

Premier League-a David Silva inkhel en ṭhinte zingah Spanish playmaker thiam bikzia inhrilh nawn kan ngai tawh lo a, season tharah erawh English top flight football-ah Silva kan hmu tawh dawn lo. 

Kum 34 mi midfielder hian City-a a contract hmang zoin an ram club Real Sociedad chu kum hnih chhung atan a zawm a, Spanish football lamah a thiamna leh theihna hmuhin a awm tawh zawk dawn. 

Silva hi Sociedad chuan Covid-19 a kai thu an puang a, a taksaah a natna pawh lang chhuak hran loin a inkhunghrang mek - hei erawh kan sawi tum ber a ni lo a, City-a a hmun ruak hi hnawh khat thei an awm ang em, tih chu kan rilrua zawhna lo awm zawk chu a ni. 

Spain tan vawi 125 inlana goal 35 khung thei Silva hian City-a kum 10 hun a hman chhungin match 436 inlansakin nomawi 14 ngawt a chawi a, hei ringawt pawh hian Silva hmun ruak luah a hautak turzia a hrilhfiah. 

Silva-a'n City a chhuahsan rualin English club hian a lim an din tur thu leh an training ground pakhat chu Silva hming an puttir tur thu an sawi a, Silva-a'n he chawimawina a phu loh thu sawitu an awm lo. 

Premier League club 'naran' takin English football-a team ṭha pawl dinhmun an luah theih nana Joe Hart, Vincent Kompany, Yaya Toure leh Sergio Aguero te nena an hnathawh hi sawi hnawm chi a ni lo a, a chung sang bera ṭhuttir an phu.

England leh Premier League legend Alan Shearer chuan, "Thierry Henry, Eric Cantona leh Sergio Aguero-te nen huang khatah awmin Premier League-a ram pawn player ṭha ber pawl a ni," a ti a, duhtawk mai loin, "Heng ho zawng zawng aia a ṭhat zawk thu pawh hi in sawi thei hial ang," a ti zui. 

World class player enkawl lama mikhual lo tak Pep Guardiola chuan, "Player ka hmuh tawh zinga ṭha ber pawl a ni," tiin a sawi a, football khawvela mi ropui pahnih thusawi nemnghet turin statistics en tur a awm. 

Kum 10 liam ta chhung khan Premier League-a chance siam hnem lamah Silva hnimhnai tu an awm lo - vawi 793 zet chance a siam laiin amah hnaih bertu Chelsea forward hlui Eden Hazard chuan vawi 595 chance a siam ve!

Silva hian kum 10 chhungin ṭhiante goal khung tur vawi 93-a siamsak a, he kum 10 chhunga assist ngah lamah amah hnaih bertu Kevin de Bruyne chuan vawi 66 assist a nei. 

City-in Silva an lakluh tirh khan wing lamah a khel ṭhin a, Roberto Mancini leh Manuel Pellegrini pawhin chutiang tak chuan an hmang - mahse Silva ṭhatna ber erawh number 10 a ni a, Pep-a hnuaia 4-1-4-1/4-3-3 formation-ah 'free eight' anga khelin a laiah talin tlarhnung puih thlengin a thawk tel bawk. 

Mahse, heti taka player thiam leh ṭha bik pawh hian chuai lam a pan ve ṭan tih hai rual a ni lo a, season hmasa khan league match match 22-ah chiah inkhel bul a 

ṭan - City-a season khata league match bul a ṭan tlem ber record a nihrual a, 2015-16 season khan hliam vangin league match 22-ah chiah bul a lo ṭan tawh.

Pep-a'n Silva chelh a tum thu sawi mah se season hmasaa Spanish midfielder khelh zat ngaihtuahin a beisei ang zat game khelh a tiam lo niin a lang a, kum 34 mi midfielder hian a vanglai a liam ve ṭan tawh tih dam takin a pawm. 

Silva-a'n a nuam tih berna hmun an rama football khel turin City a mangṭha fel tawh a, City tan pawh an player ngainat theihnghilh a, a tel loa an nun dan tur ruahman a hun ve ta. 

City midfield en ila, KDB, Phil Foden, Bernardo Silva leh Ilkay Gundogan an awm a, Silva thlak turah lungngaihna a awm lo niin a lang. Silva awm laiin KDB nen an inkawp ber a, number 10 role neitu bik awm loin free 8 angin an khel ṭhin. 

Chuta zawhna lo piang chu, Silva thlaktu tur tu nge, tih piahlamah, KDB kawppui tur tu nge, tih chu a ni tel ta a, Foden, Bernardo leh Gundogan-te hi hmun ruak luah thei vek an ni. 

City-in transfer bazar-ah centre back Nathan Ake leh winger Ferran Torres an lalut tawh a, Lionel Messi nen sawizawm mek an ni bawk - Messi hi an lalut a nih ngat chuan goal khungtu leh assist tu lamah lungngaihna tur a awm lo ang. 

Chutihrual chuan Silva a chhuah dawn khan Pep-a'n, "David-a'n a kum tawp a hmang tawh tih a sawi khan a thlakna tur lei a ngaih loh tur thu ka sawi a, a chhan chu Foden kan nei sa vang a ni," a ti. 

Pep hian midfield ni loin hmun ruak dang atan bazar-a duh vang niin a lang a, Foden-a rin tak tak vang tiin a sawi theih bawk - English midfielder hian season hman zawh takah khan inelna hrang hrangah match 38-a khel a, goal riat khungin assist vawi kua a nei. 

Hriat tel tur erawh Foden hi Silva nena khelh dan inang thlap an ni hran lo a, Pep-a'n "Silva thlaktu tur," a tih hian Spanish playmaker khelh ang taka khel tur kan nei ta e, a tihna a ni kher lo tihna a ni. 

Silva hmun ruak hi tawnhriat nei ṭha Bernardo emaw Gundogan emawin an luah ang a, Foden erawh tlarhma lamah Raheem Sterling thachhang dawltu a ni thei ang. 

Pep-a'n 4-3-3 chu a hman uar leh beisei a ni a, midfield-ah Rodri, De Bruyne, Gundogan/Silva an inkawp thei dawn tihna a ni a, thlamuang taka thlir chi an la ni chuang lo. 

City defender hlui Micah Richards chuan, "Foden hi chu thawk leh khata football mawina pho chhuaka game thlak danglam thei player a ni a, Silva erawh game kal dan hriltu, inkhel kalpui dan tur thlirtu a ni," tiin an khelh dan inan loh thu a sawi. 

A tawi zawnga sawi chuan City hian Silva hmun ruak luah 'chat' tur player an lalut dawn lo niin a lang a, an neihsaah an innghat dawn - Pep Guardiola tan Premier League player ṭha ber pawl tel loa league nomawi chawi tum hi chona hautak a ni ang.