Netherlands vs England - Nomawi a hnai ta

European champion ni turin match hnih chak a tawk ta - mahse, match hnih chak hi harsa tak a ni! Zanin dar 12:30 hian semifinal hnuhnung zawkah Netherlands leh England an intawng dawn a, European champion nih an inchuh dawn.

England-in khelh ṭhat tik ni nei lo chungin semifinal hial an thleng a, dem ngawt an harsa. Netherlands hian group stage-a pathumna ni chungin last 16 lut mah se, knockout round-ah erawh an danglam tawh a, 'Holland' dik tak kan hmu tawh.

A tawi zawnga sawi chuan, Euro 2024-a an chet dan aṭanga teh dawn chuan Netherlands-in final luh an phu zawk a, mahse, squad aṭang ringawta teh tur a nih chuan England-in nomawi chawi tur khawpin player an nei ṭha.

Zaninah team pahnihin final luh an inchuh dawn - a hmuhnawm loh ring suh. Nizan khan semifinal lehlamah Spain leh France an inhmachhawn a, he thu buatsaih a nih lai hian result kan hre hman lo.

England beiseina

Gareth Southgate-a'n 4-2-3-1 formation a hmang ṭhin a, mahse, quarterfinal-ah 3-4-2-1 a hmang a, he formation bawk hi a ring nawn mai ang em, tih chu zawhna a ni - England-in 3-4-2-1 hi hlawhtlinpui lua lo mah se, Bukayo Saka khel ṭha ringawt pawh kha lawmna tham a tling.

Chuti a nih chuan Southgate-a'n 3-4-2-1-ah Jordan Pickford chu chuhtu awm loa si ban nghak turin a ring leh ang a, tlarhnung pathumah Kyle Walker leh John Stones chu ding tur chiang niin, Switzerland lakah Ezri Konsa khel ṭha mah se, Marc Guehi-a'n hremna a tawrh zawh tawh avangin tlarhnungah a din a rinawm zawk.

Southgate-a'n left back-ah right back Kieran Trippier a ring ṭhin a, mahse, Luke Shaw a dam tawh avangin Manchester United defender hian Switzerland laka goal mawi khungtu Saka nen wing back hna an chelh ang. Midfield-ah Declan Rice-a dinpui turin Kobbie Mainoo a awm a, Manchester United midfielder hian puitlin erawh a zir tel a ṭul.

Jude Bellingham leh Phil Foden ten beisei la phak lo mah se, Southgate-a tan thlauh thlak ngawt an harsa a, tun Euro-a 'NIL' ve tak Harry Kane pawh tlarhmaah a din leh a rinawm - Trent Alexander-Arnold chuan, "Kane chawlhtir chungchang an sawi a, Southgate hian bench-ah dah ta chiah se, ka ṭhian Virgil van Dijk chu a lawm ngawt ang," a ti!

Team thar Netherlands

Netherlands-in beisei angin Euro an ṭan lo a, group stage-ah pathumna an ni! Mahse, round of 16-ah chuan Netherlands tak tak kan hmu a, 3-0 ngawta Romania hnehin quarterfinal an lut - Turkey chu 2-1 in an hneh zui.

Group Stage-a Netherlands leh knockout round-a Netherlands hi an danglam daih tawh tiin a sawi theih a, an khel a hmuhnawm ṭhin hle. Tun inelnaa goal thum khung tawh Cody Gakpo hi ven bik ngai tur a ni a, Memphis Depay-a'n beisei angin la khel chhuak lo mah se, ngaihthah a thiang lo ang.

Netherlands hian 4-2-3-1 an hman chuan Bart Verbruggen-a'n si ban nghakin, Denzel Dumfries leh Nathan Ake ten fullback hna chelhin, a laiah VVD leh Stefan de Vrij an ding dun ang - midfield-ah Jerdy Schouten leh Tijjani Reijnders an inkawp ang.

Tlarhmaah Depay a maltlat ang a, a hnung chiaha ding turin Xavi Simons a awm - mual sirah Gakpo chu lut chiang a ni a, Ronald Koeman-a'n Steven Bergwijn lakah a rinawmna lantir ṭhin mah se, beisei a la phak loh avangin Donyell Malen zawk a lut a nih pawhin mak ti suh.