England puitu Dutch striker

Netherlands international hlui pakhat chuan zanin hian an ram team hneh a tum dawn - a hming chu Jimmy Floyd Hasselbaink a ni a, Chelsea striker hlui hi England-ah assistant coach a ni mek a, attacking lam mawhphurtu a ni.

Kum 52 mi Hasselbaink hian March 2023 khan England coaching team a zawm a, Netherlands tan match 23-a goal kua khungtu striker hian tunah chuan an ram team lakah Three Lions chakpui a tum dawn.

England forward Phil Foden chuan Hasselbaink an nei chu an chhawr thu sawiin, quarterfinal-a penalty an pet danah pawh a ṭhianten inrintawkna an neih phah thu a sawi - Dutch coach hnathawh a fak.

Foden chuan, "Jimmy hian football-ah tawnhriat a nei ṭha em em a, a tih tur a hre hle. Training zawhah hian player ṭhenkhat chu penalty pet min zirpui ṭhin - England team-a koh ka nih hmasak kha chuan kan training nasa a, mahse, attacking lam puitu coach tak tak hi kan nei lo.

"Tunah chuan Jimmy kan nei a, a tawk tein penalty pet pawh min zirpui ṭhin. Penalty pet dawna ball dah dan tur thlengin kan zir a ni," a ti a, Three Lions hian Switzerland nen 1-1 a an inhnehtawk hnuin penalty-ah hnehna an chang a, penalty an chhuih lut vek!

Chutihrual chuan England tana pettute kha Cole Palmer, Jude Bellingham, Bukayo Saka, Ivan Toney leh Trent Alexander-Arnold te an ni a, penalty pet thiam tak vek an ni.