Sawmtea hmaah a club hlui Aizawl FC

LZ Juice MPL11-ah vawiin chhun dar 12:30 hian Aizawl FC leh Chawnpui FC te an inkhel dawn. Chawnpui hi season liam taa Aizawl FC enkawl B. Malsawmzuala a enkawl a, a club hlui I League club a hmachhawn tur hi en a chakawm hle.

Chawnpui FC coach Sawmtea chuan, "MPL match hrim hrima chak hi a chakawm a, mahni club hlui hneh hi a chakawm lehzual. Aizawl FC hneh tumin theihtawp kan chhuah ang," tiin Vanglaini a hrilh.

Sawmtea hian player angin MPL-ah hming a chher tawh a, coach a nih hnuah I League-ah hming a chher a, tun ṭum hi season tir aṭanga MPL club a enkawl vawi khatna tur a ni.

Chawnpui hian result ṭha nei turin player pawh an nei ṭha a, tlarhnungah Santosh Trophy-a Mizoram defender Laltluangliana an kawl a, MPL-a player hmuhnawm Vanlalthanga an neih bakah HPC Cup 2024 top scorer Lalthanzuala (TZ-a) te an neih avangin Aizawl FC tan fimkhur a ṭul ang.

Chutihrualin Aizawl FC erawh I League club an ni a, champion rinkai an ni nghal. Mahse, Covid-19 hnuah an la champion leh miah lo a, final pawh an thleng leh tawh lo.

Aizawl FC hian July 8, Thawhṭanni khan MPL11-a an hak tur jersey an tlangzarh a, jersey hi AFC layper hlui Dr H. Ngurdingliana (Ex-MLA) leh Aizawl FC I League-a champion ṭuma player pawimawh Zohmingliana Ralte ten an tlangzarh.

I League club hian season liam taa an player ṭhahnem tak an chelh thei a, chung zingah chuan defender Lalchhawnkima, midfielder Lalthankhuma, winger Lalbiakdika leh striker Lalhriatpuia te an tel a, an duhthusam player la nei lo mah se champion pui theih tur player an kawl.

Aizawl FC sporting director Hmingthansanga chuan, "Duhthusam chuan kan la inpeih hman lo a, player ṭha lakluh tumin hma kan la mek. MPL-a champion a chakawm a, mahse match khat zela kan thlir thiam a pawimawh hmasa," tiin Vanglaini a hrilh.