England tan phuba lak hun a thleng?

October 13, 1993 a ni a, World Cup qualifier-ah England leh Netherlands an intawng - Three Lions tan World Cup 1994 khel turin Netherlands laka draw result a tawk a, Dutch team tan chak a ngai thung.

England striker David Platt-a'n goal khungna chance duhawm a nei a, keeper chauh a hmachhawn lai takin Holland captain Ronald Koeman a lo lang - Dutch manager hi Platt lakah a foul a, penalty leh red card tur a ni.

Mahse, kha inkhela referee Karl-Josef Assenmacher chuan yellow card a phawrh a, freekick a pe bawk! A hnuah Koeman hian freekick a pet goal zui a, Dennis Bergkamp-a'n belhchhah ve lehin Netherlands hi 2-0 in an chak ta daih.

England boss Graham Taylor chuan, "Heng referee-te hi engtiang taka hnathawk turin nge maw zirtir an nih le?" a ti a, "Eng thil nge thleng ta hi? Thil zahthlak tawpkhawk a ni," a ti bawk.

England hian qualifier match tawp berah 7-1 in San Marino sawp mah se, World Cup khelh nan a tling tawk lo a, World Cup 1994 an khel phak lo - a hnu ni sarih lekah England boss Graham Taylor chu a bang zui.

A na asin

Graham Taylor hi a lungawi thei ngang lo. Inkhelh lai hian assistant referee lam hawiin, "Bum kan ni tih i hria tiraw? I hria tiraw?" tiin a au a, "Kha referee vang khan ka hna ka chân a, a chungah lawmthu ka sawi a ni," a ti zui.

England hi qualifier-ah hian group 2-ah awmin, Norway leh Netherlands an phak lo a, World Cup an khel lo. World Cup 1994 chu football ram ropui Three Lions tel loin khelh a ni a, a khawharthlak hle.

Mahse, England hian phuba la turin an nghah rei a ngai lo. Euro 1996-ah Netherlands nen intawngin, 4-1 ngawtin an sawp a, Alan Shearer leh Teddy Sheringham ten goal hnih ve ve an khung a, Netherlands tana Patrick Kluivert goal khung chu mualpho zualpui khuhna chauh a ni.

England duhthusam tifamkimtu chu Wembley Stadium, London-a an inkhel kha a ni a, fans 76,798 zetin a hmunah he inkhel hi an en. "Hliam a dam ta" an ti a, Three Lions an lawm takzet.

Shearer chuan, "Holland lakah total football khelin, kan hneh a ni. Sven-Goran Eriksson-a enkawl England khan Germany laka goal nga zet khung an nei a, kha match chhiar tel pawh khan Netherlands kan hneh ṭum aia ṭha zawk khan England hi kan khelh leh tak awm ka hre lo," a ti hial.

Hliam chi phul

England fans-in Euro 1996-ah phuba an la niin an hria a, thlamuang taka an awm laiin thawnthu hlui chu her lum a ni a, Three Lions an rum - kum 2018 khan Ronald Koeman a ṭawng chhuak a, 1993-a thil thleng a sawi chhuak.

Barcelona boss hlui Koeman chuan, "Kha thil thleng kha chu foul chiang tak a ni. Vawiin anga thil thleng chu ni se, red card an phawrh hial ang chu. Mahse, referee khan freekick a tihlauh," a ti a, a lawmzia a sawi.

Hetihlai hian Koeman hi Netherlands boss a ni a, kum 2020-ah Barca enkawl turin a chhuahsan zui. Tunah Netherlands boss a ni leh ta a, Three Lions rilru ti na a, hliamtu laka phuba lak hi England-in an châk dawn.

Koeman hian red card a hmu lo a ni satliah lo a, penalty chawi turah free kick a chawi. Chu chauh a la ni lo cheu - freekick hmangin goal a khung zui a, Three Lions-in Netherlands an ngam lo a ni lo a, Koeman an ngam lo a ni.

Mahse, hringnun hian mak takin kan beisei tawh loh thil a herchhuahpui fo a, thil danglam min hmuhtir ṭhin. Chutiang chiah chuan England tan zaninah hun duhawm a her chhuak a, Euro semifinal-a Koeman-a enkawl Netherlands petchhuahna remchang aia phuba lakna hun duhawm a awm chuang lo.

Thawnthu hlui chu

England leh Netherlands hi vawi 23 an intawng tawh a, an inngam tawk hle - vawi sarih ve ve an chak a, vawi kua an inhnehtawk. An intawn hnuhnung vawi thumah Netherlands hi vawi hnih an chak thung.

Kum 2019 kha team pahnih intawn hnuhnung ber a ni a, Nations League semifinal a ni. Dutch team hi 3-1 in an chak a, England an pet chhuak. Major tournament-ah vawi thum an intawng tawh a, Euro 1996-a an chak kha England chak awmchhun a ni.

Euro 1988 group stage-ah an ngam lo a, 3-1 in an tlawm. Netherlands hi an champion zui. World Cup 1990-ah group stage-ah awm ho lehin, 0-0 in an inhnehtawk a, Three Lions an chungnung hleithei meuh lo.

Gareth Southgate leh Koeman hi coach an nih hnuah vawi hnih an intawng a, vawi khat ve ve an chak. March 2018 khan Southgate hian friendly match-ah Koeman-a enkawl Dutch team a hneh a, Nations League semifinal-ah erawh chak lo zawkah an ṭang.

Zanin dar 12:30-ah chungnung zawk nih inchuhin an intawng leh dawn a, "Lo haw tawh rawh, football" tiin, football inti neitu takin England fan-te chuan nghakhlelin an thlir mek - an beisei thleng thei tak ang maw!