Police-in an zia an chhuah nghal

LZ Juice MPL11-ah champion lai Mizoram Police-in an zia an chhuah a, an khelh ṭhat loh niah team thar Ramhlun Athletic chu 3-2 in an hneh. Lalbiaksanga Colney hoten an match hmasa berah point thum hlu tak an hlawh chhuak nghal.

MPL champion lai Police hian Isak Malsawmkima leh R. Malsawmtluanga te hmangin ṭum hnih hma an hruai a, Ramhlunin Isak Malsawmkima leh Felix Lalruatsanga te hmangin an sut ve ve. Minute 90 a zawhin 2-2 a ni a, inhnehtawk thei dinhmunah ding mah se Police tan F. Lallawmkima'n chakna goal a khung.

A goal hma

RG Stadium-ah MPL11 khelh ṭan a ni a, inkhel a nung nghal hle. Police winger Lalbiakhlua'n (Biaktea) dinglam aṭangin cross ṭha a nei a, Ramhlun keeper C. Vanlalhriata'n a hnek chhuak fuh tawk lo - Isaka keah perin goal-ah a lut.

Goal luh hnuah Police an fimkhur tawk lo. Minute hnih pawh tling loah box chhungah Chhantluanga'n ball ṭha a hmu a, chiang zet a volley lut. Team pahnih an intluk tawk a, Police an chungnung thei lo.

Inkhel inhnehtawkah player thiam bik danglamna a rawn lang a, box pawn aṭangin MS-a'n a hlap lut. Ramhlun keeper Hriata sang ṭha mah se a dang hman lo. First half-ah Police-in 2-1 in hma an hruai.

Police an vannei

Second half-ah Ramhlun Athletic an insiamrem a, Police-in inkhel an thunun thei ta lo. Danny Lalduhawma'n halftime a hmang ṭha a, second half-ah Police tan buaina an siam.

Ramhlunin an nawr nat rah an seng a, box chhungah ball-in Police defender Lalrinzuala Khiangte kut a per a, referee-in penalty a pe. Felix-a a rawn pen chhuak a, goalkeeper F. Lalmuanawma bum mah se goal ban a pet per.

Police an insiamrem a, Biaktea'n chance ṭha bik a hlah. Hemi hnu hian coach BS-a Colney ngaih a ṭha a; Sawmfela, MS-a, Isak leh Biaktea te a thlak a, Police aiin Ramhlunin an ṭhatpui.

Ramhlunin minute 79-naah siphurh an sut a, penalty hlahtu Felix-a'n tihsual siamṭhain ṭha zetin a pet lut. Danny hoten siphurh an sut hnuah chak an inbeisei a, an nawr chhunzawm bawk.

Mahse, injury time-ah Police danglamna a lang. Counter attack hmangin an chhu let a, Hlutea'n ṭha takin a lalut a, substitute goalkeeper Malsawmkima pet khumin goal ban a per a, hemi per hi Lawma'n a su lut. Police an vannei a, 3-2 in hnehna an chang.