Uruguay hmaah Colombia fiahna chu!

Copa America 2024 khelh laia team hmuhnawm ber thlang dawn ila inhnialna a tam ang, champion lai Argentina tia chhangtu tam mah se Uruguay leh Colombia te hi dah hniam theih an ni bik lo.

World champion hmasa ber Uruguay hian Ningani zing dar 5:30 hian Copa America semifinal khel turin Colombia an hmachhawn dawn, ram pahnih hi tun hnaiah an inkhel a hmuhnawm ṭhin a, football tuimi tan chuan en loa liam tir mai a uiawm khawp ang.

Marcelo Bielsa enkawl Uruguay hian champion tura rinkai Brazil chu quarterfinal-ah an pet chhuak a, inkhel dangah Colombia hian Panama an sawp thung - quarterfinal bika an hmachhawn ramte an inthlau a, hei chu ram pahnih dinhmun buk nan chuan a remchang loin a rinawm.

Bielsa-a Uruguay

Team hrang hrang a enkawl kual tawh - Mizoten kan hriat larna ber erawh Leeds United a kaihhruai dan kha a ni ang, attacking game ngainatu Marcelo Bielsa enkawl Uruguay hi Colombia tan fimkhur taka hmachhawn an ngai dawn.

Liverpool striker Darwin Nunez chu tlarhma lama rinrawl a ni a, tawnhriat nei ṭha Luis Suarez aia rin hlawh zawk a ni - vanglai hmang mek a nih bakah, tun hnaiah ram tan a khel ṭha thei hle - Reds jersey a hak lai leh Uruguay tana a inlan chu a inang lo hle.

Real Madrid midfielder pawimawh Federico Valverde leh Tottenham duhlai Rodrigo Bentancur te inkawp aia ṭha hi tunlaiah sawi tur an tam bik lo, anni pahnih hian Nunez tan ball ṭha leh duhawm an siam chhuak ṭhin a ni.

La Celeste (Uruguay sawina) hian kum 2011 khan a vawi 15 nan Copa America nomawi hi an chawi a, a hnu lamah an la hlawhtling leh lo, tun ṭumah hian coach ṭha Bielsa hoin nomawi chawi leh an tum ngam mek.

Knockout tournament-a chuan tlarhnung phui ṭha a pawimawh ṭhin, defender ṭha Ronald Araujo an nei - Barcelona defender hi tlarhnung laiah Napoli defender Mathías Olivera nen an inkawp thei a, anni hi Brazi dang theitu an nih avangin Colombia lakah pawh an innghahna an ni leh ang.

James awmna Colombia

Player ṭha danglam bik a ni a, mahse a vanglai a rei lo - James Rodriguez chu tunah hian Colombia tan a vul leh mek a, tournament kal laia player hmuhnawm fal bik tia sawi theih a ni, tun ṭumah pawh hian en bik a hlawh leh dawn.

Kum 32 mi James hian inkhel a khaikhawm ṭha ṭhin a, tun hma lama a thiam ang tak khan ṭhiante goal khung tur siamsaktu pawimawh a ni mek. Venezuela an hneh ṭum pawhin James bakah Jhon Cordoba, Luis Diaz, Richard Rios leh Miguel Borja ten goal an khung.

Coach Nestor Lorenzo chuan, "Tun dinhmun kan thlen theih chhan chu team thawhhona ṭha vang a ni a, chuvangin kan boruak nuam leh ṭha tak hi kan thamral tir mai tur a ni lo ang. Khelmual chhunga lut player 11 ten an tih tur ṭha taka an hlen chhuah zel vang a ni.

"Inkhel bul ṭantu zinga tel lo pawh lungawi lo an awm ngai lo, hei hi ram tana feh chhuah chuan thil nih dan tur dik tak a ni. Team ṭha tak kan hmachhawn dawn a, he hunah hian keini pawh kan ṭha tawk tih kan lantir a ngai," tiin a sawi.

Colombia hi an match hnuhnung 27 zetah tlawm miah loin an kaltluang mek a, an boruak a fuh hle. Chutihrualin, an khingpui tur Uruguay hi team ṭha an nih avangin thapui an thawh a ngai dawn a, tlarhnumng phui ṭha a pawimawh zual ang.

Inlan tura beiseite

Uruguay:

Rochet; Varela, Gimenez, Olivera, Vina; Valverde, Ugarte; Pellistri, De la Cruz, Araujo; Nunez.

Colombia:

Vargas; Munoz, Sanchez, Cuesta, Mojica; Rios, Lerma; J. Arias, Rodriguez, Diaz; Cordoba.