Zverev lehthaltu Taylor Fritz

Hun a la liam tam lo, kum hnih liam ta lekah kha chuan Taylor Fritz hian Rafael Nadal lakah hma a hruai a, set hnih lain a khingpuiin set khat a la, mahse a tawpah chuan chak lo zawk niin lungngai takin Centre Court a chhuahsan.

Thawhṭanni zan khan Wimbledon khelhna hmun hmingthang berah bawk hian a kir a, thawnthu a danglam ta. Set hnih hloh hmasa zawk ni chungin, amah aia ranking sang leh rinkai ni zawk Alexander Zverev chu 4-6, 6-7(4), 6-4, 7-6(3), 6-3 in a hneh.

Inkhel dangah Novak Djokovic pawhin Holger Rune hnehin Wimbledon quarterfinal a lut, an inkhelh lai leh zawh hnuah fans lamin Novak an auel a, inkhelh banah a chhang let - a match lehpekah a thleng nawn a nih pawhin a mak lo ang.

Thawhlehna

Fritz-a hi 6ft 5in a sang a ni a, a khingpui Zverev chu 6ft 6in a ni thung. Player pahnih hi service nei ṭha an ni a, an san avangin an ball vuak a hlauhawm, ball kal chakna grass a nih avangin service chu an hmawnraw hlauhawm a ni.

Set hmasa paliah chuan Zverev-a'n a khingpui ball vuak a hmachhawn thei viau a, vuak let dan tur a hre ṭhin. Tihsual a nei tlem deuhin a back hand a hlauhawm bawk a, rinkai zawk pawh a ni.

Mahse, zawimuangin Fritz a insiamṭha chho zel a, a rei hnuah a khel ṭha tual tual. Set hnuhnung berah phei chuan tie break khelh ngai loin a tlang thei a, a tan thawhlehna ropui tak tia sawi theih a ni ngei ang.

American tlangval Fritz hian season a hmang ṭha, inelna lian Australian Open (quartefinal), French Open (fourth round) leh Wimbledon (quarterfinal) ah te a tawn san ber ṭum a tawng vek, sang lehzual thlen a tum ang.

Kum 26 mi Fritz chuan, "Centre Court-a inkhel entu tam tak hmaah set hnih ka hloh hmasa a, chumi hnua thawhleh chu thil mak danglam tak a ni. Set la va miah loa tlawm mai thei dinhmuna din hnua chak leh chu duhthusam thleng dik a ni," a ti.

Seeded 13-na Fritz hian a match lehpekah chuan Lorenzo Musetti a hmachhawn leh ang. Italian tlangval Musetti hian inkhel dangah Giovanni Mpetshi Perricard chu 4-6, 6-3, 6-3, 6-2 in a lo hneh ve thung a ni.

Djokovic boruak sang

Novak Djokovic hi chuan boruak danglam tak hi a nei ṭhin a, amah ṭantuten an lawm em em laiin ṭan lotu erawhin an ngaina lo hle - a bik takin Wimbledon khelhna hmunpui Centre Court-ah lawm lotu thawm a ring leh zauh ṭhin.

Grass court inelna lian berah hian vawi sarih a champion tawh a, champion hnem ber Roger Federer a tluk lohna chu nomawi pakhat chauh a ni, a hlawhtlinna leh thil tih tawh zawng zawngte chhut chuan mipui lawm hlawh nih pawh a phu.

Mahse, English mi tennis ngaina takte hian an lawm lo leh ṭhin - Rune nen an inkhelh ṭum pawhin Novak hi an auel a, a khingpui a chet ṭhat laiin mipui thawm a ṭha thei em em thung a, ama tih dik loh an lo lawm ṭhin chu a hrethiam lo hle.

Serbian star Djokovic chuan, "Kum 20 chuang professional tennis ka khel tawh a, thil awmdan boruak hi chu ka hrethiam ve tawh hle. Rune an tlawp kha chu thil dik a ni, mahse auh el kha chu hriatthiam a harsa," tiin a sawi.

Djokovic hian quarterfinal-ah chuan Alex de Minaur a hmachhawn leh ang. Australian star De Minaur hian fourth round inkhel dangah Arthur Fils chu 6-2, 6-4, 4-6, 6-3 a hnehin a thiam zual pariat zingah a lo inhlangkai ve bawk.

Grand Slam nomawi 24 chawi tawh Djokovic-a'n season a hmang ṭha tawk lo a, kuminah nomawi a la chawi lo. A khup hliam dam hlim a ni a, tun ṭumah hian a champion lo a nih chuan a kum a tam ve tawh bawk nen thawhchhuah leh a harsa ve tawh mai thei a ni.