Kalinskaya hnehtu Rybakina a tlang

Wimbledon 2024 hmeichhe inelna lamah player langsar an chesual nasa, seeded palina Elena Rybakina erawh hmalam panin a kal zel a, tunah chuan quarterfinal a invaw thleng ta.

Thawhṭanni zan fourth round inkhelah Rybakina hian a khingpui Anna Kalinskaya a hneh. Kalinskaya tan Wimbledon a thlen san ṭum a ni a, minute 53 an inkhelh chhungin 3-6, 0-3 in a hniam hman, ban dinglam hliam vangin a khel chhunzawm thei ta lo.

Wimbledon 2022 champion Rybakina inkhel a nghet ṭha em em a, a service a ṭhat avangin a tan kawng a inhawng zau nghal thei hle, a khingpui service hi vawi li a chhuhsak hman a, inkhel tluan thei pawh ni se a chak tlang zawk a nih tho a rinawm.

Inkhel dangah Elina Svitolina chuan Wang Xinyu lakah 6-2, 6-1 in hnehna a chang ve thung a, seeded 21-na hian quarterfinal-ah seeded palina leh tun hma lama lo champion tawh Rybakina a hmachhawn leh ang.

Svitolina a inkhelh hma lawk hian an ram Ukraine lamah Russia nena an indona vangin mi tam tak an thi a, an ram mipui tawrhna kara a inkhelh zawh hnuah Svitolina chuan, "Match ka khelh tawh zinga harsa ber a la ni.

"Kan ramah harsatna namen lo a thleng a, ka mi leh sa ten an tuar tih ka hriat hnu lawka match khelh chu a harsa a, tennis court-ah hun hmang mah ila rilru chuan Ukraine lam a ngaihtuah reng," tiin a sawi.