Thiago Alcantara a chawl ta

Thiago Alcantara chuan Liverpool tana a contarct a hmang zo a, club dang zawm loin football a mangṭha zui nghal, kum 33 mi chauh niin a boot a khai fel der tihna a ni.

Spanish midfielder hi hliam vangin a buai ngun em em a, 2023-24 season phei kha chuan match khat chiah a khel. Theihna nei sang tak ni mah se a hliam vangin a nih tur ang a ni phak lo tia sawi theih a ni.

Thiago chuan, "Football vangin hun hlimawm leh hriatreng tawh tur tam tak ka tawng a, ka theihnghilh tawh ngai lo ang - football chungah ka lawm. He infiamna hian khelmual chhung leh pawna mihring ṭha zawkah min siam," a ti.

Kum 2022-23 season tawp dawn khan Thiago hi a khel bawr hliam zai a ni a, hei vang hian a chawl rei hle. Kumin February thla khan Arsenal an hmachhawn ṭumin a lo kir a, mahse he inkhelah hian hliam a tuar leh ta tho - a vanduai ve takzet.

Liverpool tan match 98 khelin FA Cup a chawipui a, Reds tana a khelh hma hian Bayern Munich chu Bundesliga, German Cup leh Champions League nomawi a lo chawipui tawh bawk a ni.

A bul ṭanna Barcelona tan La Liga nomawi vawi li a la hman bawk a, hliamin a tlakbuak viau chungin a inkhelh hun chhungin nomawi lian a chawi hnem hman hle.