Milan tana rinawmna tiamtu Ibrahimovic

AC Milan striker Zlatan Ibrahimovic chuan Italian club tana season khat dang khelh chhunzawm turin contract thar a ziak a, season tharah chuan Milan jersey ha chungin kan la hmu dawn tihna a ni. 

Swede striker ropui hian January thla khan season tawp thleng atan Milan hi a zawm a, a ṭul dan a zira pawhsei theih tura tih a ni - match 20-ah goal 11 khunga assist vawi nga neiin tunah chuan contract thar pek a ni ta. 

Ibra hian kar hmasa lam khan Milan-ah hian contract thar a ziak nia sawi a ni a, official taka puanzarna erawh Thawhṭanni zanah khan Italian club hian an nei ve chauh a ni. 

Kum 38 mi Ibra hian October 3-ah kum 39 a tling tawh dawn a, kum 40-a nih dawn thlengin European top flight football-a khel dawn tihna a ni - a namai lo hle. 

AC Milan tana a season hmasa ber 2010-11-a Serie A nomawi lo chawi tawhtu Ibra hian kar khatah £120,000 a hlawh dawn nia sawi a ni a, kum 38 mi striker-in European top flight league-a a hlawh atan chuan la tam tham tak a ni.