Chanmari tan Dawngtea a la mawi reng

LZ Juice MPL11-ah champion rinkai Chanmari FC-in an match hamsa berah hnehna an chang nghal a, kai thar FC Bethlehem 2-0 in an hneh. Chanmarians hian MPL5-a nomawi chawipuitu Lalsangzuala Hmar an lak kir vangin champion an inbeisei a, chutihrualin Sanga chauh an la let lo - MS Dawngliana a la let tel.

Bawngkawn forward Dawngtea hian goal hnih a khung a, Chanmari a chakpui. Kum 10 liam taa Chanmari kawr mawipui ṭhin tawhtu Dawngtea'n a thiam a la theihnghilh lo a, team chakna a la ni.

Chanmari FC-ah tualchhung player ṭha rual an rawn inlan a, Santosh Trophy qualifier leh final round-a tel player pakua ngawt an awm. Squad-a tel lo pawh National Games-a gold medal la tawh Zothanmawia (T. Mawia), Bengaluru FC midfielder hlui Malsawmzuala leh Aizawl FC midfielder hlui Lalhmangaihkima te an ni a, an ṭha hlawm hle.

Mahse, khelmualah erawh Chanmari hi Lalhriatpuia Sailo enkawl FC Bethlehem lakah an chungnung thei bik lo a, chance siam pawh an harsat. Chanmari lakah Kiran Chhetri, Danny Zorammawia, Lalfamkima leh Mesak Lalramdinpuia Ralte te an zam bik lo.

First half-ah goal a lut lo a, chutihrualin Khawpumawia (Mapuia) chu hliam vangin lakchhuah a ni a, Kelkang striker hi a mit hnuai ruh hmun thumah a tliah avangin damdawi in kalpui nghal niin, nizan khan zai nghal a ni.

Chanmariin second half-ah chak ngei tumin an nawr a, bench aṭangin nikum I Day Football best player Lalnunzira leh India junior team tana khel tawh Lalrokima te an lut.

Minute 72-naah Chanmariin Bethelehem tlarhnung an su hawng a, dinglam aṭanga Moses Lalrinzuala cross chu awmna hmun tur taka awm Dawngtea'n a pet goal. Dawngtea hi goal khatah a la lungawi lo a, minute 83-naah corner kick aṭanga ball kal chu box pawn aṭangin mawi zetin a pet goal.

Hun tawp dawn hnaiah FCB-in Danny hmangin chance nei bawk mah se T. Mawia'n ṭha takin a dang. An match hmasa berah Chanmari an khel ṭha tawk lo a, chutihrualin goal hnih khungin goal an chhuah lo.