Derby d'Italia-ah chak zawk an awm lo
Mauro Icardi goal hmangin Inter Milan-in Carlos Tevez hmanga Juventus hmahruaina goal an sut a. Derby d'Italia boruak sang takah Roberto Mancini enkawl Milan-in player 10 ni chungin hmahruaitu Juventus an chelh a, 1-1 in an inhnehtawk.
Inter-in loan-a Arsenal aṭanga an lak Lukas Podolski chu bench-ah an ṭhuttir a; Defender Yuto Nagatomo chu Japan-in Asian Cup khel turin a ko a, damlohna avangin Rodrigo Palacio a khel thei lo bawk. December 22 khan Juventus-in Italian Super Cup-ah Napoli penalty shootout-ah an hneh lo a, team moral tiṭha tur leh Roma nena inthlauhna point thum ni zel turin chak an mamawh.
Thawhlehni zan inkhelah mualneituin bul an ṭan ṭha nghal a, Fernando Llorente-a'n chance ṭha a hlah hnuah Tevez-a'n goal hmahruai a khung - he goal hi Arturo Vidal siam sak a ni a, minute nganaa lut a ni.
Inter defender Danilo D’Ambrosio a che ṭha a, keeper Samir Handanovic pawhin Vidal goal khung tur leh Andrea Pirlo free kick te a dan sak a. Handanovic hian Llorente leh Paul Pogba te a tibeidawng chhunzawm bawk.
Juventus defender Giorgio Chiellini chu Inter defender Juan Jesus-a'n a nghawk avangin a lungawi lo takzet a, referee-in hmu se chuan penalty tur a ni.
Second half-ah Podolski a inlan a, Inter siphurh suttu erawh Icardi a ni. Minute 64-naah Fredy Guarin cross chu Icardi-a'n goal-ah chantir a, hei hi Inter-in goal zawna an pet hmasa ber a ni. Icardi hi Juventus lakah hian a vannei ve hrim hrim a, ṭum li a hmachhawn tawhah goal nga a khung.
Inkhel chawhnu lamah pawh Pirlo freekick a la hlauhawm reng a, amaherawhchu Inter keeper Handanovic a chet ṭhat chhunzawm avangin Juvetus-in goal dang an khung thei lo.
Inter tana goal khungtu Icardi chance vawi hnihna tur chu Juve defender Patrice Evra-a'n ṭha takin a dan sak. Icardi hian Chiellini tihsual zarah chance dang nei lehin substitute Daniel Osvaldo pass aiah ama khung a tum a, goal zawnah a pet lo.
Minute 86-naah Inter playmaker Mateo Kovacic chu hnawhchhuah a ni a, inkhel result erawh a danglam phah lo.
Inkhel dangah Roma-in minute 17-naa defender Davide Astori goal hmangin Udinese an hneh a, hmahruaitu Juventus nena an inthlauhna chu point khat chiah a ni tawh.
Eng nge an sawi?
Juventus manager Max Allegri chuan, "Inkhel a harsa dawn tih chu kan hria a, chutichung chuan a tir minute 45 kha chu tun season-a kan khelh ṭhat ber ṭum a ni. Amaherawhchu, minute 90 chhung kan khel ṭha tluan thei lo a, goal kan chhuah hma pawh khan tih dik loh kan nei ṭan tawh. Second half-ah khan kan midfielder-te an tlan tam lo, hemi position-a khel thei tur player thar kan mamawh. Transfer laiin pakhat tal lak luh chu kan duh. Wesley Sneijder hi kan mamawh ang player a ni a, mah se tunah chuan Galatasaray player a ni," tiin a sawi.
Inter manager Roberto Mancini chuan, "Inkhel harsa tak ni mah se chak thei kan ni. Second half-a kan chance ṭha hlah kha a uiawm a, point thum kan chan phah a ni. First half-ah Juventus-in inkhel an thunun a, second half-ah kan insiam ṭha a, team ṭha zawk kan ni. Team-in hma kan sawn zel a, chutihrualin Turin-ah chak theihna chance kan neih chuan kan bawhpelh tur a ni lo," tiin a sawi.
Walter Mazzarri hnuaiah match 37-ah Inter Milan-in goal an chhuah hnuah ṭum li chauh an tho leh thei a, Roberto Mancini hnuaiah erawh an danglam. Mancini hnuaia vawi riat an khelh tawhah ṭum li zet goal an chhuah hnuah point hlawh chhuak turin an ding chhuak.
Inkhel Results
Lazio 3 - 0 Sampdoria
Udinese 0 - 1 Roma
Chievo 0 - 0 Torino
Empoli 0 - 0 Hellas Verona
Genoa 2 - 2 Atalanta
Milan 1 - 2 Sassuolo
Palermo 5 - 0 Cagliari
Parma 1 - 0 Fiorentina
Cesena 1 - 4 Napoli
Juventus 1 - 1 Inter Milan