United tan Falcao-a'n a zia a chhuah lo

Colombia striker rothap 'The Tiger' hming lem an vuah Radamel Falcao hi Manchester United tan goal thum chiah a la khung a, a zia a la chhuah tak tak lo.

Louis van Gaal tan Falcao hi a nghet a la lut turin pound maktaduai 43 bawr vel sen a ngai dawn a, tunah rih chuan Manchester United hian thutlukna an la siam ngam lo tawp ang.

Tunge Falcao chu?

Radamel Falcao Garcia Zarate hi February 10, 1986 khan Santa Marta, Columbia-ah a piang a. Amah hi feet nga leh inches 10-a sang a ni a, goal khung theihna hi a pian pui ve hrim hrimah mi tam takin an ngai.

Kum 13 leh ni 199-a upa a nihin Colombian Categoria Primera B club Lanceros Boyaca tan a inlan ṭan a, Colombian zinga professional football khel thei naupang ber a ni. Talent a neih ṭhat avangin Colombia-ah a cham rei lo a, kum 17-a upa a nihin Argentina club lian River Plate-in an la lut. Youth team aṭangin bul a ṭan a, kum 2005-ah chuan player pawimawh a ni tawh.

Kum 2009-ah FC Porto-in Lisandro Lopez chu Lyon-ah an chhuah tir a, a thlak turin Falcao hi euro maktaduai 3.93 in an la lut. He club hi khawvel hriata Colombia forward hming chherna a ni.

Porto hi Primeira Liga (1), Taca de Portugal (2), Portuguese Super Cup (2) leh UEFA Europa League (1)-ah te a champion pui vek a. Europa League-a an champion ṭum hian tops scorer a ni a, final-ah man of the match-a thlan a ni.

Kum 2011-ah Atletico-in Manchester City-ah an star forward Sergio Aguero an chhuah a, a thlak turin Falaco chu euro maktaduai 40-in an la lut a, Atletico club history-a player manto ber a ni. Spanish club tan Falcao a che ṭha a, Copa del Rey (1), UEFA Europa League (1) leh UEFA Super Cup (1)-ah te a champion pui leh a. Europa an champion ṭum hian top scorer a ni a, final-ah man of the match-a thlan a ni leh bawk.

Kum 2013-ah thilmak a thleng a, club tam tak sawmtu awm mah se sum tamna Monaco a pan. A man hi pound maktaduai 60 vela ngaih a ni a, season khat chhunga a hlawh hi pound maktaduai 14 ang vel nia chhut a ni. Monaco neitu Dmitry Rybolovlev phurna a tla hniam a, club enkawl nana sum hman zat a tih tlem avangin player ṭha a hralh chhuak a. Falcao pawh supporter lamin ui viau mah se United-ah loan a chhuah tir a ni.

Goal khung record chu

Season hnuhnung pangaa Falcao goal record kan thlir chuan tun hnaiah a tlahniam tih kan hre thei ang. Porto tana a season hnuhnung berah khan league match 22-ah goal 16 a khung a, target-ah vawi 37 a pet a, record ṭha a ni.

Atletico-ah record ṭha zawk a nei chhunzawm a, season hnih chhungin league match vawi 34 ve ve a khelin goal 24 leh 28 a khung a. A record ṭha tak avang hian Europe club lian hoin an hel nasa hle.

French club Monaco tana a khelh lai hian inhliam vangin a khel tam tawk lo a, inhliam vang hian Colombia tan FIFA World Cup-ah a inlan ve thei lo bawk. Ligue 1-ah vawi 17 khelhah goal 19 a khung a, a goal record a tlahniam. Manchester United-ah hma a sawn thut lo - vawi 12 khelhah goal thum chiah a la khung.

Manchester United a zawm tirh kha chuan bench aṭanga a luh dawn a in warm up ringawt pawhin mipui thawm a ṭha a, tunah chuan mipui a au tir thei tawh meuh lo. Falcao-a'n a theihna lantir turin season chanve dang a la nei e.