Lukaku goal-in Everton chhanhim

Goodison Park-ah Everton chak lo thei dinhmunah an ding a, minute 92-naa Romelu Lukaku goal hmangin an him hram.

Thawhlehni zan FA Cup inkhelah West Ham United-in defender James Collins goal hmanga an hmahruaina an venhim zawh loh avangin replay an khelh a ṭul dawn ta a ni. Team pahnih inkhela chak zawk hian fourth round-ah Doncaster emaw Bristol City emaw an hmachhawn ang.

Everton hi a zawnin vawi li an chak lo tawh a, Thawhlehni zana inkhelah pawh hian player-te leh inkhel entu 22,236 an hlauthawng leh hle.

Roberto Martinez-a'n Everton a enkawl ṭan tirhin game nung tak an khel ṭhin a, tunah erawh season liam taa an game kha an pha tawh lo.

First half-ah goal a luh loh hnuah minute 56-naah Morgan Amalfitano corner pet chu vengtu nei lo Collins-a'n a tauh lut a, West Ham 1-0 in hma an hruai. Everton aia defending ṭha lo Premier League club zingah pakhat chiah an awm.

West Ham tan Stewart Downing a khel ṭha a, mikhual team hian hun tam zawk chu inkhel an thunun. Downing goal khung tur hi Everton keeper Joel Robles-a'n a dan sak a, a ball cross ṭha tak chu Matt Jarvis leh Amalfitano te'n an khung lo bawk.

West Ham chance ṭha ber erawh Ecuador forward Enner Valencia-a'n a hlah a, Amal­fitano cross chu Valencia hian a tauh ṭha tawk lo a, keeper Robles-a'n a dan sak.

Injury time-ah Everton an vannei a, Bryan Oviedo cross chu Lukaku-a'n volley goal a, 1-1 in inkhel a tawp.

Thawhlehni zan inkhel dangah Scunthorpe leh Chesterfield te an inhnehtawk.

Eng nge an sawi?

Everton manager Roberto Martinez chuan, "Keini tan chuan Cup hi a pawimawh a, chak lo ila chuan a pawi khawp ang. Tun hnaiah kan che ṭha lo a, Manchester City kan hmachhawn nghal dawn avangin kan hmabak hi a awlsam dawn lo. Chutihrualin Romelu a che ṭha a, a puitlin tawh avangin mawhphurhna a la thei a. Eng team pawh hmachhawn ila chak result nei thei tur player kan nei," tiin a sawi.

West Ham manager Sam Allardyce chuan, "Kha pa (Lukaku) khan kan lamah a pet goal leh tawh. Kan inhmachhawn apiangin kan lamah a tilut ziah. A pawi lai chu goal hnih khung theihna tura kan hlah kha a ni. Enner Valencia khan tauh goal se chuan Everton kha an tho leh tawh lo ang," tiin a sawi.