United-ah Ronaldo a kir lo ang - Di Maria

Manchester United-in Cristiano Ronaldo an la let dawn anga sawi a awm ṭhin a, Real Madrid tana Ronaldo khelhpui ṭhin Angel di Maria chuan he thuthang hi a ṭawmpui ve lo.

United winger Di Maria chuan, "Manches­ter-ah Ronaldo hi a rawn kir ka besei tawh lo. Real Madrid-ah Ronaldo hi a che ṭha a, Spanish club hi chhuahsan a har hrim hrim bawk avangin a club khelhna thlak hi a duh lo ang," tiin a sawi.

Ronaldo hian tun season-ah Real tan vawi 15 a inlan tawh a, goal 26 a khung tawh. Karleh hian FIFA Ballon d'Or dawng tur puan a ni dawn a, Ronaldo hi rinkai ber a ni bawk.

Di Maria hian United captain Wayne Rooney chu a fak chhunzawm a, Argentine winger chuan, "Rooney chet dan hmang hian ka rilru a khawih khawp mai. Minute 90 chhung a khel a, match zawng zawngah a theihna zawng zawng a lanchhuah tir ziah. Mak ka tih lai chu engtik lai pawh a chak duh a, a rilṭam ṭhin hi a ni," tiin a sawi.

Di Maria hi Man­chester United history-a player manto ber a ni a, season tir khan Real Madrid aṭangin pound maktaduai 59.7-in United in an la lut.