Ṭahin awmzia a awm lo - Zola

Thawhlehni zan khan Cagliari chuan Chelsea star hlui Gianfranca Zola hnuaiah Serie A game hmasa ber an khel a, Palermo lakah 5-0 in an tlawm.

Zola hian English club West Ham United leh Watford a enkawl tawh a, Italy U21-ah assistant coach hna chelh tawh bawk. Amaherawhchu, league hriatthiam har tak Serie A-ah club a la enkawl ngai lo a, bul a ṭan ṭha lo.

Cagliari boss Zola chuan, "Bul ṭan dan ṭha tak chu a ni lo, a harsat chu kan ring sa a, khatiang em em khan a harsa ang tih kan ring pha lo. Kan match hmasa ber aṭang hian zir tur nasa tak kan nei a, insiamṭha turin theihtawp kan chhuah ang. Ṭahin awmzia a awm lo a, kan tlukna hmun aṭangin hian thawh leh kan tum tur a ni," tiin a sawi.