Copa del Rey - Bilbao leh Malaga te an chak

Thawhlehni zan khan Copa del Rey Round of 16 inkhel pahnih a awm a, Athletic Bilbao leh Malaga te'n an khingpui Celta Vigo leh Levante te an hneh. Nizan khan inkhel pali a awm a, zanin hian Sevilla leh Granada bakah Elche leh Barcelona te an inkhel leh bawk ang.

Second leg hi karleh lama khelh tur a ni.

Spanish Cup-a vawi 23 champion tawh Athletic Bilbao-in Celta Vigo tlar hnung chetsual an vanneih pui a, 4-2 in hnehna an chang. Bilbao tan hian striker Aritz Aduriz a che ṭha a, goal hnih a khung bakah Mikel San Jose goal hmahruai khung tur a siam sak a, Markel Susaeta-a'n goal a khung ve bawk.

Celta tan Alex Lopez leh Charles te'n an khung a, heng goal pahnih hmang hian an si phurh an sut ve ve a. Amaherawhchu Celta hian goal hnih dang an chhuah belh avang leh an player David Costas hnawhchhuah a nih bawk avangin second leg-a comeback a harsa tawh khawp ang.

Bilbao manager Ernesto Valverde chuan, "Result ṭha tak a ni. Celta chetsual kan hmang ṭangkai a, quarterfinal lut turin dinhmun ṭha takah kan ding. Amaherawhchu Celta hian player an nei ṭha a, second leg-ah chesual thei kan ni," tiin a sawi.

Malaga-in minute 16-naa Anor goal hmangin hma an hruai a. Levante-in an siphurh sut theihna nei mah se keeper Francisco Ochoa a che ṭha a, ṭum hnih ṭha takin a dang. Minute 78-naah Malaga-in Luis Alberto hmangin goal hnihna an khung leh a, 2-0 in an chak.

Heng inkhel pahniha chak te hi quarterfinal-ah an inhmachhawn ang.