Sassuolo lakah Milan an tlawm

Kum 17 hnua a vawi khatna atan AC Milan chuan kum thara an game hmasa berah an tlawm, an hneh loh hi team ṭha lo zawka ngaih Sassuolo an ni.

Thawhlehni zan hian Milan-in bul an ṭan ṭha a, minute riatna lekah midfielder Andrea Poli chuan a club hlui lamah Milan hmahruaina goal khung nghal mah se mikhual team hian Nicola Sansone leh Simone Zaza goal hmanga lehthalin 2-1 in a chak.

Milan-in Philippe Mexes, Nigel de Jong leh Pablo Armero te chu hrem vangin an chhawr thei lo a; inhliam vangin Daniele Bonera, Marco van Ginkel leh Keisuke Honda te an chhawr thei lo bawk. Amaherawhchu Alex leh Mattia De Sciglio te an rawn kir a, player thar Alessio Cerci pawh hman theih turin bench-ah ṭhuttir a ni bawk.

Season liamta khan Sassuolo-in Milan hi ṭum hnih an hneh. Milan hian an khelmuala 4-3 a hneh loh avangin an manager Max Allegri-a'n a hna a chan phah a. May, 2013 khan Stadio Meazza-ah Sassuolo 2-1 in an chak leh bawk.

San Siro inkhelah Milan-in goal khung tumin an nawr nghal a, Giacomo Bonaventura cross chu Stephan El Shaarawy-a'n goal-ah a chantir thei lo mah se a per chu Poli-a'n yard riat lek aṭangin minute riatnaah goal-ah a chantir nghal.

Milan-in goal bawh a na chhunzawm a, tlar hnung erawhin fiah an dawl lo. Minute 27-naah Sassuolo midfielder Domenico Berardi ball vawrh ṭha tak chu Sansone-a'n goal-ah a chantir a, Milan defender Alex-a ven uluk tawk loh vang a ni.

Berardi a khel ṭha chhunzawm a, Sassuolo-in second half-ah bul an ṭan ṭha zawk. Tlar hma ti chak turin Michael Essien aiah Cerci luh tir a ni a, Italian winger hian chance ṭha a hlah nghal. Minute 67-naah Berardi corner pet chu Zaza-a'n nalh takin a volley a, keeper Diego Lopez tan dah theih a ni lo.

Milan-in an siphurh sut tumin an nawr let a, substitute Giampaolo Pazzini leh Cerci te'n keeper tan hna siam ve ve mah se goal an khung lo a. Sassuolo 2-1 in an chak.

Milan boss Pippo Inzaghi chuan, "Inkhelh ṭan tirh minute 15 kha chu a awlsam viau a, goal hnih kan khung thei lo kha kan chak loh phah ta a ni. Ṭum dang kan pha lo a, kan chet ṭhat tawk loh vanga chak lo kan ni," tiin a sawi.

Player thar chungchang sawiin Inzaghi chuan, "Cerci hian tun Atletico-ah khelhna hmun a chang tam lo a, chuvangin beisei san nghal vak chi a ni lo. Sassuolo lakah ṭha tak tak a chet ṭum a nei a, amaherawhchu Milan chhandamtu tur erawh a ni lo. A hman dan tawk tur kan thiam a ṭul a ni," tiin a sawi.