India World Cup squad an puang

Kumin February leh March-ah Cricket World Cup khelh tura India team chu an puang fel ta a, player 15 thlan zingah mipui mak tih tur an awm meuh lo.

Hetihlai hian Indian selector-te chuan kum 2011-a India a champion ṭuma player pawimawh Yuvraj Singh chu a thlang tel lo a; batsman panga, wicketkeeper batsman pahnih, allrounder pathum - left arm spinner pahnih, medium pacer pakhat, seamerspali leh specialist spinner pakhat an ko a ni.

Indian selector-te hian Australia leh New Zealand-a nghah tur World Cup atan hian tun hnaia inhliam Ravindra Jadeja an thlang tel a, ani hi dam chiang hman tura beisei a ni a; Ishant Sharma pawh a khup a tina deuh chungin an thlang tho a ni.

BCCI secretary Sanjay Patel chuan, "Jadeja hi tunah a inenkawl mek a, tuna Test match khelh mekah a tel lo ang a, hemi zawha inkhel turah chuan a tel thei tawh ang. Ishant pawh a inhliam a, ani pawh hi tuna Test match khelhah hi chuan hahchawl tura tih a ni a, a dam leh thuai ang," a ti.

Player thlan theih tur mi 30 an chhawpchhuaha telh loh, thlan tura an sawi rik leh si Yuvraj Singh-a chungchang an zawhna chu, "Yuvraj Singh chang ni loin midangte chanchin pawh sawiho a ni a, Indian selector pangate leh captain MS Dhoni leh coach Duncan Fletcher-te chuan tuna player 15 hi an thlang chhuak ta a ni," tiin BCCI secratary chuan a sawi.

Squad: MS Dhoni, Shikhar Dhawan, Rohit Sharma, Virat Kohli, Ajinkya Rahane, Suresh Raina, Ambati Rayudu, Ravindra Jadeja, R Ashwin, Akshar Patel, Ishant Sharma, Mohammed Shami, Umesh Yadav, Bhuvneshwar Kumar, Stuart Binny.

2015 World Cup

2015 Cricket World Cup hi 'ICC Cricket World Cup 2015' an ti deuh kher ṭhin a, February 14 leh March 29 chhungin Australia leh New Zealand-ah nghah a ni ang. Ram 14 inelna turah hian match 49 khelh tur a awm dawn a, khawvela cricket thiamte chu an kim vek dawn a ni.

Australia-in inkhel 26 an thleng dawn a, hengte hi khawpui pasarihah - Adelaide, Brisbane, Canberra, Hobart, Melbourne, Perth, Sydney - khelh a ni ang. New Zealand-a khawpui pasarihin - Auckland, Christchurch, Dunedin, Hamilton, Napier, Nelson, Wellington - inkhel 23 an thleng ve thung ang.

Final hi cricket khelmual hmingthang Melbourne Cricket Ground-ah khelh a ni ang.

Inkhel ngaihven hlawh ber chu India leh Pakistan inkhel tur a ni a, anni pahnih hi February 15-ah an intum dawn a; he inkhel enna ticket hi minute 12 chhungin an hralh zo vek niin an sawi!