India football coach tur Stephen Constantine

India football coach thar tur chu a hlui! All India Football Federation (AIFF) chuan India coach lo ni tawh Stephen Constantine chu India football team enkawl turin a thlang.

Kum 2002-2005 chhunga India team lo enkawl tawhtu hi tun hnaia India coach hna ruak diltu zingah a tel a, October-a chawl ta Wim Koevermans a thlak ang. India coach tur hi diltu ṭhahnem tak an awm a, AIFF Technical Committee chuan hei hi thlirin NorthEast United FC coach Ricky Herbert leh Constantine-te hi India coach ni tura an chhawp chhuak zingah an tel a, Constantine hi an thlang ta a ni.

Rwanda national team enkawltu ni mek Constantine hi London-a piang niin Cyprus lam mi a ni a, khawvel ram panga-ah team a enkawl tawh a, hetiang ti thei hi amah chiah British zingah an la awm. Ram ropui tak ni lo mah se India bakah Rwanda, Nepal, Malawi leh Sudan-te a lo enkawl tawh ṭhin.

English FA hnuaia UEFA pro licence nei a ni a, FIFA-in elite coaches’ panel a siamah kum 2000 aṭang khan a tel tawh a, khawvel hmun hrang hrangah coach-te training pein a zin kual ṭhin a ni.