Song-a'n Cameroon kawr a hlip

West Ham United star Alex Song chuan international football a chawlhsan thu a puang a, Africa Cup of Nations awm tura Cameroon team-ah pawh a khel ve dawn ta lo a ni.

Song hi 2014 FIFA World Cup Croatian player Mario Mandzukic a tihtluk vanga red card pek a nih hnu khan ram tan a la inkhel leh lo a; a tirah Africa Cup of Nations khel tur squad-ah pawh an ko lo a, Sevilla defensive midfielder Stephane M'Bia a inhliam hnuah a thlaktu turin an ko leh a, a kal duh ta bik lo a ni.

Barcelona aṭanga West Ham-a loan-a khel mek chuan, "World Cup hnua koh ka nih zui loh avang leh, Africa Cup of Nations squad-a koh ka nih loh avangin ram tana inkhelh ka chawlhsan thu hi ka puang ta a ni. Africa Cup of Nations khel tur zingah min koh leh an tum thawm a awm tih hi chu a dik a; nimahsela ka chhungte nen ngun takin kan ngaihtuah tawh a, tun hi chawlh hun niin kan hria a, thutlukna dik siamah ka inngai," a ti.

Arsenal player hlui chuan an ram phatsantu a nih loh thu sawi chiangin, "Kan ram ka hmangaihna hi chu a la pangngai reng a, tunah erawh international football ni lo lamah ka rilru ka sawrbing tawh ang. Cameroon team hi duhsak­na ka hlan e," tiin a thlah.

Cameroon hian African Cup of Nations-a an game hmasa berah January 20 hian Mali an tum dawn a; Group D-ah awmin Guinea leh Ivory Coast-te nen an inkhel leh bawk ang.