Klopp a phûr dawn chauh

Borussia Dortmund boss Jurgen Klopp chuan season chawhnu lamah hma an sawn tur thu a sawi a, season chanve an la hmabakah ṭha taka khel tura a inpeih thu a sawi.

Champions League-a round of 16 thleng thei Dortmund hi Bundesliga lamah an mualpho a, game 17 khelh tawhah vawi li chiah an chak a, tunah hian a hniam ber dawtah an awm mek. January 31-ah Bayer Leverkusen nen inkhelin Bundesliga hi an chhunzawm dawn a, tunah hian Spain-ah training an nei mek.

Klopp chuan, "Tunah chuan ka inpeih tawh a, ka tha pawh a za zak mai. Kan hmalamah hian beiseina sang tak ka nei a, khelh hmabak tam tak kan neihte hi ṭha takin ka kalpui thei ngei ang. Season chawhnu lam hi chu ṭha taka bul ṭan ngei kan duh," tiin a sawi.