Coca Cola Cup khel tur Mizoram Sub Junior team inpeih

India rama naupang football thiam rualte inelna, Sub Junior National Football Championship for Coca Cola Cup, 2014-2015 final round chu January 13-27 chhung hian Goa-ah neih a ni dawn a, Northeast Zone champion Mizoram team chuan naktuk hian Aizawl chhuahsanin Goa an pan ang.

Final round-ah hian state 10 an awm a, hengte hi group hnihah ṭhen an ni. Mizoram hi Group B lamah awmin Kerala, Maharashtra, Haryana leh Jharkhand-te nen hmun khatah an awm tlang a; Group A-ah Meghalaya, West Bengal, Goa, Chandighar leh Karnataka-te an awm thung. Group khata awmte hi an inkhel kual chhuak ang a, a sang pahnihin semi final an lut dawn a ni.

Mizoram hian January 16-ah Jharkhand a tum ang a, January 18-ah Haryana, January 20-ah Maharashtra tumin January 22-ah Kerala a tum leh ang.

Mizoram team inbuatsaihna:

Mizoramin Northeast Zonal Round a thleng a, Champhaiah nghah niin tournament hmain thla khat zet training an nei hman a, an champion nghe nghe. Player-te hi anmahni khuaah ṭheuh Krismas an hman hnuah January 29-ah Aizawlah training an nei leh a, residential camp nei nghalin an inbuatsaihna a ṭha hle.

Mizoram manager Hming­thansanga chuan, "Kan inbuatsaih ṭha a, player discipline-ah duh­thusam a ni a, kan lawm khawp mai. Kan khingpuite hi kan rualpui dik tak an nih chuan kan hneh ngei chu kan ring," a ti.

Hmingsanga chuan, "India rama kan buaina ni fo kum dik lo chungchangah MFA a khauh a, player-te kum dik tak vek, naupang te te a thlang a, a ṭhen chu MFA Grassroots project hnuaia naupangte an ni a, kum 14 hnuai lam a ni chungin kum 13 lek lekte kan ni a, kan naupang khawp mai. State dangin fair taka an kalpui phawt chuan tuna kan naute hi chu kan ring tawk a, theihtawp kan chhuah ang. Engpawhnise hmun hla taka kal tur kan ni a, kan inbuatsaih ang taka kan khelh theihna turin Mizo mipuite ṭawngṭaipuina kan ngen a ni," a ti.