Harsatna paltlang lo a awm theih em?

Retheihna paltlanga hlawhtlinna chang milarte

Retheihna emaw, harsatna dang eng eng emaw kha i hlawhtlin theih lohna chhanah te, hniam bik nia i inhriatna chhanah te i lo pawh kual tawh ṭhin em? In chhungkua in retheih vang emaw, i
ṭhanlennain a zir loh êm vang emawin hlawhtling thei lo leh rethei nia i inngai a nih chuan nangma thiam loh a ni ang. Heng milar leh hlawhtlingte pawh hian i harsatna leh retheihna anpui kha an lo paltlang ve tawh tho a nia!

Rethei bakberha an awm lai an hre chhuak ve ram ram ṭhin ngei ang. Harsatna hi mitin hian kan nei a, kan hmachhawn ṭheuh a, rilru paukhauh leh huaisente erawh chuan hlawhtlinna hmanruaah an hmang ṭhin. Retheihna chhuanlama sorkar nawr vak vak emaw, tu tu emaw mawhchhiat kual hian dinchhuahna a thlen lem lo a, theihtawpa bei lêtte an hlawhtling ṭhin thung.
Khawvela actor thiam ber pawla an ngaih a, Oscar a lak hleih theih loh avanga miin an vui pui luai luai, Leonardo DiCaprio hian a naupanlaia an retheih ṭhinzia hi a sawi chhuak tam lo nain, LA Times-in nikum February thlaa an kawmnaah, "Rethei em emin ka seilian a ni," tiin a sawi chhuak. Veng kilkhawrah a seilian a, Hollywood Boulevard leh Western Avenue velah ruihhlo leh sualna chi tin reng karah a seilian a, ani pawhin hengte hi a tem ve nual. Mahse a harsatna a hmachhawn ngam a, a beilet a, tunah chuan mi hlawhtling a ni ta.
Hilary Swank pawh hi a naupanlai chuan a khawngaihthlak ṭhin hle. Washington-ah an khawsa ṭhin a, in chu sawi loh, apartment luahna tur takngial pawh pawisa an nei lo. Los Angeles-ah khawsak nawm deuh beiseiin an pem a, mahse eng ruai an ni chuang lo, apartment luahna tur sum an neih loh avangin motor-ah te an riak mai mai ṭhin.
Nu leh pa ruihhlo ti ṭhin emaw, a ngawl vei an nih avangin beidawng duh lem suh, Demi Moore pawh hetiang dinhmun hi a thleng thei a nia. A nu leh pa an inṭhen hnuah a nu bulah a awm a, pahrawn a nei thuai a, a nu leh a pahrawnte hi zu ngawlvei an ni. Kum 14 a tlin hmain vawi 30 chuang lai an insawn kual hman. Kum 16 a nihin high school a kal lai a tawpsan a, mahse beidawng loin a ti hram hram a, tunah chuan actress hlawhtling a ni ta.
Khawvela rapper hausa ber ni ṭhin Jay-Z pawh hi, New York-a Brooklyn venga seilian a ni. Ruihhlo nena inchiahpiah nuaina hmuna seilian a ni a, a pain an chhungkua a kalsan hnuah a nu leh a unaute pathum nen harsa takin an khawsa ve naw naw. Pawisa an mamawh phuhrukna turin thil ropui ngaihtuah theih a ni lo, cocaine a zuar ve ṭhin a, ṭum thum lai silaiin an kap tawh nghe nghe.
Sarah Jessica Parker pawh hi a ni tho. "Kan retheihzia kha ka hre reng ṭhin...a changin electric chhit tur pawh kan nei zo lo a, Krismas hmang ve tur pawhin pawisa kan nei lo. Bill pek tur kan neih loh avangin kan phone pawh min tihtawpsak a, birthday lawmte chu khawi lam a ni ringawt," a ti.
Oprah Winfrey hi sâwn ve mai a ni a, a pi bulah kum ruk zet a awm a, an rethei hle. Thuamhnaw hak tur pawh a nei ngai lo a, a neih chhun chu alu ip (sai ip puan) aṭanga siamte a nih ṭhin avangin a school kalpuiten an hmusitin nuihza siam nan an hmang nasa ṭhin hle. Tunah chuan amah nuihzat ṭhintute chanchin hriat tur a awm tawh lo a, tute nge a school kalpuite kan hre lo a, khawvel nu zahawm leh hausa a ni daih tawh a ni.
Tleirawl khawvelin an lawm leh an ngaihsan Justin Bieber hi Canada-a Ontario-a seilian a ni. Now Daily chanchinbuin an kawmnaah, "Kan rethei em em ṭhin, hei hian tun ka dinhmun hi min thlentir niin ka hre hial. A bikin pawisa kan nei lo thei em em. Ka nu nen restaurant-a kan kal pawhin ei tur chiah chiah bak leina tur kan nei lo a, ei tur pawh plate khat chauh kan lam a, ka nu nen kan inei ṭawm ṭhin. Plate hnih lamna tur daih kan nei lo a, a man to leh tui leina tur kan nei ngai lo bawk," a ti.