La Liga a ngaihnawm thar leh ta

Real Madrid leh Barcelona-in beisei an phak loh avangin a ngaihnawm tur angin La Liga a ngaihnawm tawk lo a, Spanish top flight football-in hlut a hlawh tur angin a hlawh tawk loh phah ang hialin a ngaih theih. 

Mahse, tun hnaiah Real Madrid leh Barcelona-ten result ṭha an rawn nei ve leh ta a, Spanish top flight football pawhin ngaihven a hlawh thar leh ta.

La Liga hmahruaitu Atletico Madrid chu zanin dar 6:30-ah Elche nen an inkhel dawn a, zan dar 8:45-a Barcelona leh Valencia inkhel tur hi a hmuhnawm dawn tih a chiang. 

Pathianni zan dar 1:30-ah Real Madrid an inlan dawn chauh thung a, Eibar khelmualah Zinedine Zidane-a naute hi an inlan ang. 

Diego Simeone enkawl Atletico Madrid-in La Liga-a an match hnuhnung berah Madrid derby khelin Real Madrid chu 2-0 in an ngam lo a, league table chung lama an dinhmun a derthawn sawt phah. 

Atletico hian league-ah hma hruai mah se Real Sociedad leh Real Madrid nen an point hmuh zat a inang a, chutihrual chuan Sociedad ai hian match thumin an khel tlem a, Real aiin match hnihin an khel tlem bawk. 

Chutihrual chuan tun season-a champion an mitthla ṭan tawh chu thai bo an duh lo a nih chuan zaninah Elche hneh ngei a ṭul dawn - Real leh Barca thlengin hlauhawm an tling pha leh tawh. 

Atletico hian hliam vangin Jose Gimenez, Diego Costa leh Manu Sanchez an chhawr thei dawn lo a, Hector Herrera chu Madrid derby-ah a inhliam bawk - league table-a 14-na Elche laka talbuai phahna tur erawh niin a lang lo. 

Cadiz laka rin loh taka an tlawm hnuin Barca-in league match hnih chhung a zawnin hnehna an chang leh tawh a, an match hnuhnung bera an hneh hi an inhmachhawn laia La Liga hmahruaitu Real Sociedad an ni. 

Barca-in inrintawkna an neih belh leh tawh ang tih a chiang a, coach Ronald Koeman chuan, "Tuna kan rilru puthmang leh duhna anga kan khelh zel chuan kan awmna tur dik takah kan la awm thuai ang," tiin Sociedad nen an inkhelh zawhah a sawi. 

Dutch coach thusawi aṭanga lang chu champion an la beisei ngam tihna a ni a, thil theih pawh niin a lang - hmahruaitu Atletico an phak lohna hi match khata khel tam zawk chungin point ruk chiah a ni tlat. 

Mahse, tun season-a hriatthiam harsa tak Barcelona tan Valencia hmachhawn hi a awlsam dawn lo. Valencia hi tun season-ah table-ah 12-na ni mekin beisei phak bik lo mah se Barca tan chetsual theihna an ni. 

Barcelona-in hliam vanga chawl rei sa Ansu Fati, Sergi Roberto, Gerard Pique leh Ousmane Dembele an la chhawr thei dawn lo a, tun hnaiah player inhliam erawh an nei lo. 

Tlarhmaah Lionel Messi bawk chu mit fukna a ni leh dawn a, Martin Braithwaite-a'n inkhel bul a ṭan a nih chuan Philippe Coutinho-a'n bench a luahlum leh ngeiin a rinawm a, Pedri leh Antoine Griezmann-ten bul an ṭan bawk ang. 

Valencia-in Kevin Gameiro leh Jasper Cillessen chu hliam vangin an chhawr thei dawn lo a, Barcelona tana season thum chhung goal lo veng tawh Cillessen inlan thei lo tur hi Valencia tan channa a tling. 

Barcelona tan hriat tur pakhat a awm - Valencia hi 4-1 a Real Madrid sawp tawhtu an ni a, tun season inelna hrang hranga match 10-a khelh aṭanga goal ruk khunga assist vawi li neitu Carlos Soler hi theihnghilh loh a ṭha ang. 

Real Madrid-in Pathianni zan dar 1:30-ah Eibar an lenchilh dawn a, Zinedine Zidane-a naute hi chak tur chiang saa dah ngam an ni - team boruak ṭhat vanglai tak a ni leh tawh. 

Real hian Sevilla 1-0 a an hneh hnuah Champions League tlak hlauhthawnawm aṭanga tho chhuakin Borussia Monchengladbach chu 2-0 in an hneh a, Madrid derby-ah Atletico Madrid an hneh zui a, Athletic Bilbao an hneh leh tawh bawk. 

Zinedine Zidane-a naute hian Bilbao an hneh hma khan tun season-ah a zawna vawi li chak an la nei lo - Pathianni zanah a zawna a vawi nga nan chak an tum dawn a, Eibar tan Real tum chakawm loh lai tak a ni. 

Real a pan hnua inhliam ngun tak Eden Hazard chuan training a zawm leh tawh a, mahse Zidane-a'n Eibar laka 'risk' lak ai chuan la nghah deuh det a thlang zawkin a rinawm. Zanin Inkhel Tur