Torres leh Atletico-in Real lungngaihna an belhchhah
Kum 2015-ah Real Madrid an la chak lo vek. Nilaini zan khan Atletico Madrid-in Copa del Rey last 16 first leg-ah an hmelma Real Madrid 2-0 in an hneh a, quarterfinal lut turin an dinhmun a duhawm hle.
Vicente Calderon-ah Fernando Torres-a'n Atletico starting eleven a chang nghal. Raul Garcia-a'n minute 58-naah a penalty hlawhchhuah chu goal-ah a chantir a, hun tawp hma minute 14-ah Gimenez de Vargas-a'n tauh lut lehin Atletico chak a nemnghet.
Real Madrid-in La Liga-ah Valencia an hneh lo a, hemi ṭuma goal khungtu Cristiano Ronaldo chu Nilaini zan hian bench-ah ṭhuttir a; keeper Iker Casillas aiah Keylor Navas a lut a, player pawimawh dang erawh an lut nghal. James Rodriguez, Gareth Bale, Karim Benzema, Toni Kroos leh Isco te an inlan a, mimal tin hi Atletico tlar hmaa khel pha vek tur an ni.
Atletico tan Torres a inlan nghal avangin Mario Mandzukic a awl a, El Nino hi tlar hmaah mal tlatin a hnungah Raul Garcia, Saul leh Antoine Griezmann te an intlar a. Keeper Moya Rumbo aiah kum 22-a upa Jan Oblak a lut bawk.
Madrid Derby chu
Inkhelh ṭan tirhah Real Madrid an che ṭha zawk a, defender Sergio Ramos ball tauh ṭha tak chu keeper Oblak-a'n a dan sak a. Minute 14-naah vei lam aṭanga James cross chu Bale-a'n tauh lut mah se offside vangin pawm a ni lo.
Atletico-in counter attack an hmang ṭangkai a, French forward Griezmann-a'n ram tana a khelhpui Varane bum mah se hun a duh hret avangin Real defender hi a insiamrem a, Griezmann hi a tackle buai hman. Real tlar hnung ball clear uluk loh vangin Raul Garcia-a'n chance ṭha a nei a, a hlauhawm hmain Brazilian defender Marcelo a inrawlh hman hram.
Hun chanve hma lamah goal a lut lo a, second half-ah Real bawkin chance an nei hmasa a; Isco ball pek ṭha tak chu James-a'n goal zawnah a pet nachungin keeper Oblak-a'n a dan sak. Hla tak aṭanga Marcelo ball pass chu Bale-a'n goal khung nana hman ngei tumin a volley a, goal zawnah a kal lo.
Minute 58-naah goal a lut ta a, penalty aṭanga lut a ni. Raul Garcia-a'n Real defender Ramos laka a penalty hlawhchhuah chu cool takin a khung.
Real-in an siphurh sut tumin James aiah Ronaldo an luh tir a, Atletico-in goal venhim tumin Torres aiah Koke an luh tir thung. Real an insiamrem a, an inkhelh dan aṭanga a lan danin an siphurh an sut mai dawn niin a lang. Amaherawhchu, minute 76-naah Gimenez-a'n corner aṭangin a tauh lut a, Atletico Madrid-in 2-0 in hma an hruai ta der mai. Second leg awlsam zawka khel turin Real-in goal an mamawh a, an khung theih loh avangin Santiago Bernabeu-a an hmabak a harsa sawt ang.
Real Madrid hian tun season-a Atletico vawi thum an hmachhawn tawhah goal an la khung lo.
Eng nge an sawi?
Atletico forward Fernando Torres chuan, "Vicente Calderon boruak a nuam a, kan result-ah kan lawm takzet a ni. Khawvel team ṭha ber zinga mi hneh hi a nuam a ni," tiin a sawi.
Real Madrid wing back Marcelo chuan, "Khelh dan bik an nei a, counter hmanga an khelh dan hi dan thiam a ṭul. Second leg a la awm avangin chance kan nei a, coach thutlukna a pawimawh ang. He statium hi khelh a harsa a, an khel ṭha hrim hrim bawk," tiin a sawi.
Real Madird boss Carlo Ancelotti chuan, "Ronaldo-a'n bul a ṭan loh chhan chu a chauh deuh vang a ni. Ball kan inpek kual danah ṭum dang kan pha lo a, a hma lamah ball pass kan harsat a, a sir zawngin kan in pass tam mah mah a ni. Amaherawhchu, Atletico hian defending an thiam ve hrim hrim a, an khel ṭha tel bawk," tiin inkhel chungchang a sawi.
Real boss chuan sawi chhunzawmin, "Chak vak kan mamawh a, La Liga-a Espanyol kan hmachhawn hunah inrintawkna nei turin point thum neih ngei ngei a ngai. Atletico kan hmachhawn leh hunah chuan kan khelmualah kan khel tawh dawn a, kan la chak thei," tiin a sawi.
Atletico Madrid manager Diego Simeone chuan, "Inkhel pawimawhah chuan kan khingpuite kan elpui phak a ngai, chumi tur chuan coach-te leh physio te'n hna ṭha tak an thawk a. Inelna pathuma inpeih turin player-te an buatsaih a ni. Player 12 chiahin a khelh theih lo a, 20 emaw 21 tal kan neih a ṭul a; Atletico tana khelh a pawimawhna an hriat a ṭul bawk," tiin inkhelh ṭan hmaa an inpeih thu a sawi.
Atletico boss chuan Torres chungchang sawiin, "Fernando khan team chhungah phurna a pe a, a chak bawk avangin team tan a ṭangkai hle. Chutihrualin a nihna tak phochhuak tur chuan match fitness a la mamawh," a ti. January 15 zanah Real Madrid nen Copa del Rey last 16 second leg an khel leh ang.