Season tluan khel loah ka inngai - Azarenka

World no. 1 hlui Victoria Azarenka chuan kum 2014 kha inhliam vangin atan chuan hun harsa a nih thu a sawi.

Azarenka hi tunah ranking-ah 42-naah a awm mek a, kum 2015-a a inkhelh hmasak berah Karolina Pliskova chu Brisbane-ah a hmachhawn a, darkar thum an inkhelh hnuah a chak lo.

Nikum chungchang sawiin Azarenka chuan, "Season tluan khel loah ka inngai. Ka dam chian theih loh avangin inbuatsaihna ka nei ṭha lo a, ka training duh ang zat ka nei thei lo. Inkhel turin ka rilru a inpeih lo a, ka thlir let leh hian 100% in ka fit lo a ni. Tunah erawh inkhel leh turin ka inpeih e," tiin a sawi.

Tennis chawlhsan chungchanga a rilru put hmang chungchang a zawhna chhangin Azarenka chuan, "Tennis chawlhsan hi ka ngaihtuah ngai lo. Ka rilru tak takin chu chu ka sawi a ni. Harsatna pumpelh theihna tura ka tlan chhiatna chu tennis hi a ni. Chuithrualin na nei chung chuan inkhelh a harsa ṭhin," tiin a sawi.

Azarenka hian Grand Slam title pahnih a la tawh a, kum 2012 leh 2013 khan Australian Open-ah a champion. Kum 2012 hian kum tawpah world no. 1 a ni. Kum 2014 khan quarterfinal-ah Agnieszka Radwanska hneh loin a tla a, hemi zawha a inkhelh panga zinga paliah a chak lo zui bawk.

August 2014 hnuah inelna pathum chiah a hmachhawn a, US Open-ah erawh quarter final a thleng.

Rilru lamah harsatna a neih hma thu sawiin Azarenka chuan, "Sawi nuam tak chu a ni lo, amaherawhchu ka hun tawn khan rilru lam thlengin min nghawng a ni. Ka dik lo a ni tih ka pawm thiam aṭangin hma ka sawn ṭan a, tunah chuan ka hmabak a chhona hmachhawn turin ka inpeih," tiin a sawi.