Old Trafford-ah Valdes Real-in De Gea an lei dawn em ni?

Victor Valdes chuan Old Trafford a pan dawn tih a chiang ta a, thla 18 chhung atan contract a ziak dawn.

Barcelona goalkeeper hlui hi a inhliam avangin tun hnaiah club nei loin a awm a, United-ah hian hun eng emaw chen training a nei tawh a, United hian contract ziahpui tlakah ngaiin an la nghet dawn ta a ni. Hetihlai hian Real Madrid lei tum nia sawi David De Gea chungchangah titi a tam phah hle.

Victor Valdes hi kum 32-a upa a ni tawh a, football khawvela tawnhriat ngah ber zinga mi a ni. Barca-a awmlaiin Champions League-ah vawi thum champion tawhin La Liga-ah vawi ruk a champion tawh bawk.

Valdes hian season hmasa an ṭan hma khan Nou camp chhuahsan a tum thu hi a puang tawh a, season hmasa tawp thleng khel tura a contract neih chu pawhsei a tum tawh lo. A tum aia hmain Barca tana a game hnuhnung ber a khel a, a inhliam avangin March thla hnuah a inlan tawh lo.

A hliam a inenkawl chho a, dam ṭhat leh beiseiin United training-na lam a zawm a, October aṭang khan United-ah hian a training tawh. Tunah a dam ṭha ṭan a, tun season bakah season thar lo awm tur tawp thlenga United kawr ha turin an inrem ta ni.

Football khawvela cham­pion team-a ṭum 23 lo tel tawh Valdes keeper hi United first-choice goalkeeper David De Gea thlaktu tur angin mi ṭhenkhat chuan an sawi a, De Gea hi Real Madrid lama kal tur anga sawi a tam hle.

Real leh de Gea

Hetihlai hian British chanchinbu lam ziah danin United chuan Valdes an biak fel rual hian De Gea pawh contract thar ṭha zawk ziahpuia a rei thei ang ber Old Trafford-a khel tura dah ngheh an duh a; nimahsela Spanish goalkeeper hian Spanish team lian aṭanga sawmna a hmuh chuan a kal mai ring pawl an awm ve bawk.

De Gea hi Atletico Madrid keeper hlui a ni a, an hmelma ṭhin Real lama kal a duh dawn lo tia sawi pawl an awm bawk a, Valdes-a an lakluh dawn avangin De Gea chanchinin sawi a hlawh ta hluai a ni.

Kum 2011-a Atletico Madrid aṭanga pound maktaduai 18.9-a United-in an lei De Gea hi khawvela goalkeeper man to ber pathumna a ni a, kum 2001-a pound maktaduai 33-a Juventus-in an lei tak Gianluigi Buffon kha tun thlengin goal keeper man to ber a la ni a; pahnihna chu Bayern Munich goalkeeper Manuel Neuer niin kum 2011 khan Schalke aṭangin pound maktaduai 19-in an lei.

Real hian De Gea hi an lei dawn a nih chuan khawvela goalkeeper man to ber ni ngei tura ngaih a ni a, Spanish media lam tarlan dan chuan Real hian De Gea manah Gareth Bale pek tel pawh an phal hial niin an sawi - hengte hi chu chanchinbu lam rin dan a la ni a, official-a thupuan a la awm lo.