LA Galaxy pan tur Stevie G

Liverpool captain Steven Gerrard chuan LA Galaxy a zawm dawn tih a chiang ta a, July thla khian MLS club hi a zawm ang.

Galaxy president Chris Klein chuan, "Steven la lut tur hian theihtawp kan chhuah a, field chhung leh pawnah nasa taka min puih theih kan beisei," tiin a sawi.

Kum 34-a upa England midfielder hlui Gerrard chuan, "United States-a bul ka ṭan thar hi ka phur tawh takzet a ni. Galaxy hi MLS history-a team hlawhtling ber an ni a, an nih chhunzawm zel theih nan theihtawp ka chhuah ang. He club ka thlanna chhan hi tun hnaia an hlawhtlinna vang hi a ni. Champion nomawi leh medal lak belh hi ka la duh a ni. Chawlh hmang turin MLS-ah hian ka kal lo," tiin a sawi.

Gerrard hian Liverpool tan nomawi 10 a dawng a, chung zingah chuan Europe-a trophy ngaihhlut ber Champions League a tel. Kum 2005 khan Champions League final-ah Liverpool-in Italian club ṭha AC Milan ropui takin an lehthal a, hemi ṭum hian Gerrard hi team kaihruaitu leh sulsutu a ni.

LA Galaxy head coach leh general manager Bruce Arena chuan, "Steven-a anga theihna ngah, tawnhriat nei ṭha leh huaisen kan la lut thei hi vannei kan inti hle a ni. Khawvel player langsar ber zinga mi a ni a, amah hi naupang zawkte tana entawn tlak a ni," tiin Gerrard a fak.

Season ṭantirh khan Gerrard ang bawka English midfielder hlawhtling Frank Lampard-a'n MLS club New York City a zawm a. Amaherawhchu, loan-in Premier League club Manchester City a zawm a, a contract an pawhsei leh bawk avangin season pum Premier League-ah a inlan dawn.

Gerrard pawh hi Lampard ang thoin Premier League-ah loan hmanga let leh turin thu thang a awm a, Gerrard erawh hmelma club ni loin a khelh mekna Liverpool-a let tur anga sawi thawm a awm a. Galaxy president Chris Klein chuan he thuthang hi a dik loh thu a sawi.

Klein chuan, "Gerrard hian LA Galaxy chiah a ngaihtuah tawh ang. Steven hi player danglam a ni a, mipui pawhin an ngaihven nasa. Khawvel pumin a hming an hria a, mipui pawh an phur a ni," tiin a sawi.

LA Galaxy hian Premier League player langsar tak tak David Beckham, Tim Cahill, Jemain Defoe leh Robbie Keane te an lo la lut tawh a ni.

Liverpool defender hlui leh MLS club lo enkawl tawhtu Steve Nicol chuan, "Thiery Henry leh David Beckham te nen Gerrard hi inang khat an ni. Gerrard hi khawvel superstar ni pha a ni a, league tan chuan hei aia ṭha a awm chuang lo. Tun dinhmunah Gerrard hian theihna nasa tak a nei a, Galaxy pawh hian an hlawk pui ngei ang," tiin a sawi.

LA Galaxy manager hlui Ruud Gullit chuan, "Mi zawng zawngin Gerrard hian Liverpool a hmangaih tih an hria a. Amah­erawhchu, a career hi a thlir kir chuan tuna a tawn theih aia tam hi a duh ngei ang. Ka ngaihdan chuan tun aia hma hian Liverpool hi a chhuahsan turah ka ngai. Liverpool ka huat vang lam a ni lo, player nih chuan tawnhriat chi hrang hrang neih hi a ṭha a ni. England player ṭha ber zinga mi nih chuan trophy lak a duh a, chumi tur chuan Liverpool hi a chhuahsan a ni," tiin a sawi.