Ballon d'Or ceremony-ah Barca tel dawn lo

FIFA chunga an lungawi lohna lantir nan Barcelona president Josep Bartomeu chuan January 12-a Ballon d'Or ceremony, Zurich-ah tel an tum loh thu a sawi.

FIFA-in Barcelona hi dan phalna lo anga naupang (Under 18) an ziah luh avangin kum khat chhung player lak luh a khap sak a, Catalan club hian Court of Arbitration for Sport (CAS)-ah an zualko a, an hlawhtling lo.

Barca president Bar­tomeu chuan, "FIFA hian thubuai kan neihna kawnga bultumtu min hrilh lo a, min hrilh hma chuan anni nen hian kan inzawmna kan chhu chat ang. Sepp Blatter-a hnenah lehkha ka thawn a, Fifa Ballon d'Or gala-ah pawh ka kal lo ang. Tun hi a tawpna tur a ni lo, hun a duh rei pawhin he thubuaiah hian chak loh kan tum lo," tiin a sawi.

2014 Ballon d'Or dawng thei zingah Lionel Messi a tel a. Argentine forward bakah hian Claudio Bravo, Jordi Alba, Dani Alves, Javier Mascherano, Gerard Pique, Xavi, Andres Iniesta, Luis Suarez leh Neymar te chu Fifa FIFPro World XI atana thlan theih zingah an tel bawk. Barca player-te hian an president hnung an zui ang em tih erawh a la chiang lo.