Moyes-a enkawl Real Sociedad an chak lo

Copa del Rey last 16-ah Villareal-in Marcelino Garcia goal hmangin Real Sociedad-in an hneh. Sociedad hi David Moyes a enkawl an ni a, Barcelona an hneh vanga an phur lai takin an chak lo nghal. Inkhel dangah Valencia-in Espanyol an hneh a, Almeria leh Getafe te an inhnehtawk.

Villareal 1-0 Real Sociedad

Estadio El Madrigal-ah Real Sociedad-in chance an nei hmasa zawk a, Moi Gomez-a'n goal khung theihna chance chu keeper Enaut Zubikarai zawnah tak a tauh.

Halftime hma hretin mual neitu tan Jonathan-a'n chance ṭha a hlah leh a, second half-ah erawh Villareal-in inkhel an thununna chu goal-ah an chantir ta a. Russian forward Denis Cheryshev-a'n minute 72-naah goal a khung a, Villareal 1-0 in an chak.

Valencia 2 - 1 Espanyol

Hun tawp hma minute lia Alvaro Negredo penalty hmangin Valencia-in an khel­mual Mestalla Stadium-ah Espanyol 2-1 in an hneh.

Valencia-in bul an ṭan ṭha a, minute 11-naa Jose Gaya goal hmangin hma an hruai nghal. Minute 33-naah Victor Alvarez hmangin Espanyol-in an sut teuh viau a, amaherawhchu keeper Yoel Rodriguez-a'n a goal khung tur chu a dan sak.

First half-a goal khung ve lo Espanyol an khel ṭha zel a, second half-ah Christian Stuani hmangin an siphurh an sut a. Valencia keeper Yoel chetsual vangin Lucas Vazquez-a'n mikhual team tan hmahruaina goal a khung leh teuh hle.

Hun tawpah Valencia an vannei a, Garcia-a'n Espanyol defender Pau Sabata lakah penalty a hlawhchhuak a. Man­chester City aṭanga loan-a an lak Negredo-a'n penalty aṭangin a chakna goal a khung.

Almeria 1 - 1 Getafe

Estadio de los Juegos Mediterraneos-ah Getafe-in bul an ṭan ṭha zawk a, Fredy Hinestroza ball pek ṭha tak chu Alvaro Vazquez-a'n a khung nghal teuh hle.

Minute 21-naah Getafe midfielder Verza a chesual a, ho takin an lamah a tilut.

Amaehrawhchu, second half-ah Verza-a'n a tihsual siamṭhatna hun remchang a nei a, minute 59-naah penalty aṭangin an siphurh a sut a. 1-1 in inkhel a tawp.