City striker thar tur Bony

Manchester City chuan Swansea City aṭangin Wilfried Guemiand Bony an lei dawn a, indawrna tihfel thawkhat a ni ta.

Kum 2007-a Liverpool-a khelh duha trial nei, Anfield-a khel tlak loa an ngaih hi tunah chuan Premier League club lian bakah Real Madrid hial pawhin lei an duh niin an sawi a, Man City lamin pound maktaduai 30-a lei turin an be fel thawkhat tawh a, inremna an ziah thuai rin a ni.

December 10, 1988-a piang Ivorian striker hian 2014 chhungin goal 20 a thun tawh a, season hmasa chawhnu lam leh tun season tir lamah a chet ṭhat avangin kum 2014 chhung bika Premier League goal thun hnem ber a ni nghe nghe.

Swansea manager Garry Monk chuan an player pawi­mawh hi chhuahtir an ui hle tih a sawi a, "An lei dawn a nih chuan pawisa tam tham tak a ngai ang," tiin a sawi. Bony man tur zat hi hriat ni lo mah se pound maktaduai 30 vel tura ngaih a ni a, a contract-ah 'pound maktaduai 20 chinin a lei chhuah theih ang,' tih a inziak niin an sawi.

Chhuah a hnai e

Africa Cup of Nations khel turin Bony hi a kal dawn a, he mi hmaa amah kawmtute zawhna chhangin, "City-in min duh tih hriat hi thil lawmawm a ni. Mi zawng zawngin Champions League-a khelh hi an châk a ni. Indawrna a kal tluang a, engtin nge a kal zel dawn ka hre lo a, tunah chuan kan ram tana ka inkhel turah chiah rilru ka dah," a ti.

Bony agent Francis Kacou chuan, "Kan indawr zel a, eng emaw chu a thlen ngei kan beisei. Kan inbe fel ngei dawn niin a lang a, club dang nen kan indawr tih an sawi hi chu a dik lo a, City nen chiah kan indawr a ni... tunah hian sum chungchangah tihfel tur a la awm a, ni tam a duh tawh lo ang," a ti.

Heti a nih chuan City hian an lei ngei dawn niin a ngaih theih tawh a ni.

City-in an mamawh em?

City hian striker ṭha tak Sergio Agüero an nei a, striker rintlak dang Edin Dzeko leh Stevan Jovetic-te an nei bawk.

City-te ang club hausa leh intihsikna tam taka tel thei tan chuan striker pathum hi an tlem a, hei bakah hian Manuel Pellegrini hian Premier League-a player rintlak tur a zawng. Aguero hi sawi ngai lo a ni a, striker dang pahnihte hi 'ṭha thawkhat' an ni a, 'super star' han tih tur an la ni phak lo - pawisa nei City tan striker thar lei hi a finthlak a ni.

City hian Bony hi an lei a nih chuan Dzeko hi an chhuah mai ring an awm leh ṭan a, Dzeko hian striker ṭha dangte remchan loh hun chân ringawt hi a ning ve tawh a, Champions League khel phak lo team-a kal mai pawh a hnial lo niin an sawi.

Bony a ṭhang duang

Hman ni lawkah Premier League-ah kan hmu a, tunah chuan City striker a ni dawn ta. He Ivorian player hi World Cup zawh hlim pawh khan Liverpool leh Arsenal-in an lo beisei daih tawh a; nimahsela pound maktaduai 20 tal lo chuan an hralh phal lo a, a man avangin an lei ngam ta lo niin an sawi.

Swansea hian kum 2013 khan Bony hi Vitesse Arnhem aṭangin pound maktaduai 12-in an lei a, hetihlai hian Dutch League-a top scorer a ni. Premier League-a a luh hnuah a che ṭha chhunzawm a, a season hmasa berah intihsiakna hrang hrangah goal 25 a thun nghal der.

Tunlai khawvelah striker man a to em em a, striker langsar ber ber zinga lang phak si lo, goal thuntu ṭangkai tak ni thei si Bony hian rimtu a ngah hle. Liverpool leh Arsenal bakah Tottenham Hotspur pawhin lei an duh niin an sawi a, Real Madrid hial pawh an sawi ri - Real hian Karim Benzema bak hi 'centre forward' rintlak an nei lo a, chuvangin Holland leh England-a hlawhtling tawh Bony hi man to tak ni si lo ṭangkai thei turah an ngai nia sawi a ni.