Vawiinah Federation Cup semi final ISL a zo, fans an bo!

India ram 'FA Cup' ve Federation Cup chu tunlai hian Goa-ah khelh mek a ni a, vawiin hian semi final khelh a ni ang.

36th Federation Cup-ah hian a thlengtu Goan club pathum Dempo, Salgaocar leh Sporting Goa-te'n semi final an lut a, anni bakah hian I League champion Bengaluru FC chuan semi final an lut bawk.

December 28-a khelh ṭan Federation Cup hi Jawaharlal Nehru Stadium, Margao leh Tilak Maidan, Vasco-ahte khelh a ni a, I League team 10-te inelna a ni. Group hnihah awmin group tin an inkhel kual chhuak a, a tawpah a sang pahnih ve ve semi final khel turin an tling ta a, January 11-ah final khelh a ni ang.

Mizo kan hmu e

Tun ṭum Federation Cup chu Mizo player 'thar' kan hmu nual. Kan hmelhriat lâr S Malsawmtluanga'n East Bengal tana goal a thun hi thil mak a ni lo a, Jeje Lalpekhlua, Lalrindika Ralte, Robert Lalthlamuana-te tan Federation Cup hi thil thar a ni tawh lo.

Shillong Lajong lamin an rawltharte intahhriamna atan he tournament hi an hmang a, an foreigner-te leh ISL-a an player pawimawhte an hah­chawlhtir deuh vek a, naupang rual an khelhtir. Goal thuntu zingah Lalrammuana, Ramthar Veng leh Jacob Lalrawngbawla, Tlungvel-te an tel a, anni hi kum lama la naupang zawk Lajong-in an chher hriam mekte an ni.

Royal Wahingdoh khel a hmuhnawm

ṭhin a, an tawnhriat neih loh tuarin hun tawp lamah goal chhuah an ching a, I League an khelh tur atan inzirna ṭha tak a ni ngei ang. An tlar hnunga player pali zinga pathum chu Mizo an ni a, Lalchhawnkima, Champhai; Lallawmzuala, Thingsai leh Lalhmangaihsanga (Sena), Mualcheng-te an intlar a, midfield-ah Malsawmtluanga, Tlangnuam kan hmu zauh zauh bawk a, anni hi I League-a hmel thar kan hmuh turte an ni.

ISL leh a nghawng

India ramin a la hmuh ngai loh, football inelna ngaihhlut tak mai Indian Super League kan hmu a, khawvel footballer ropui ni ṭhinte hmel pawh kan hmu tel hial. TV-ah hmuhnawm takin an chhuah a, inkhel entu an ṭha a, foreigner ṭha tak tak an inlan.

ISL a liam a, Federation Cup a inṭan ta chiah a, Indian football-in entu a nei tlem nghal hle. An inkhelhna khelmual a la ngai a, a inkhelte pawh ISL-a mi an la ni fur a; nimahsela a cheibawlna Bollywood star leh TV lam thilte an bo tawh a, foreign star langsarte an haw tawh a, khelmual ruakah India rama cup inchuhna lian ber chu an khel ta. Hei hi a ṭhat leh ṭhat loh sawina atan chuan a la hma lutuk a, ISL hi Indian football tihmasawntu a la ni thei a, tiṭhuanawmtu pawh a ni palh thei - hunin a la hril ang.

Thil lang chiang tak erawh chu hei hi a ni - I League club an buai! Bengaluru FC, Salgaocar FC leh Sporting Clube de Goa-te hi ISL-a an player-te chhuah ve phal lote an ni a, an pathuma semi final an lut ṭhawt pawh hi a mak lo. Jeje leh Didika-te ISL lama an tlanlai khan, Beikhokhei leh Sunil Chhetri-te chuan Bengaluru tan training uluk takin an lo nei reng a ni.

Tunah Mohun Bagan, East Bengal leh club dangte I League khel turin an inbuatsaih mek a, an buai ṭan ta. An player ṭhenkhatin 'pre-season' an hmang mek a, ISL-a an player chhawrte tan chuan 'hahchawlh' ngai khawpin ISL lamah an inhmang rim a, team inbuatsaihna a buai mek.