FIFA eClub World Cup Bale-a team an chak zo lo

Real Madrid forward Gareth Bale-a esports club Ellevens chuan FIFA eClub World Cup final khel mah se Complexity Gaming an hneh lo a, Milan khawpuiah Complexity Gaming an champion. .

American football team Dallas Cowboy neitu Jerry Jones-a club Complexity hi Ellevens nen hun pangngaiah 0-0 in an inhnehtawk a, mahse penalty hmanga chak zawk zawn a nih hnuah Complexity hi a chungnung zawkah an ṭang ta a ni. 

Complexity Gaming player pahnih kum 21 mi Joksan Redona Tello leh kum 17 mi Max Popov te chuan champion manah £31,000 (Nuai 28.57) an hlawh a, 20 Global Series ranking points an hlawh chhuak tel bawk. 

Tello chuan, "Nipui hunah FIFA eWorld Cup khelh phak ngei kan tum avangin kan tan chuan FIFA eClub World Cup nomawi chawi hi a hlu takzet a ni," a ti. 

Esports ṭhang zelah Gareth Bale chuan February 3 khan Ellevens neitu zingah a tel thu a puang a, 38 Entertainment Group leh footballer hlui Larry Cohen te nen an club hi an inṭawm 

a ni.