Man City player 'nghet' Lampard Lampard-a'n Chelsea fans a bum em ni?

Khawvel ngaihdan - Frank Lampard hian Chelsea chhuahsanin New York City FC a zawm a, Manchester City-ah loan-in a khel. Premier League thuneitute hmuh chhuah - Lampard hian New York City FC-ah contract a ziak lo a, Man City-ah chian contract a nei!

Khawvel hriat dan

Lampard hian season hmasa khan hun rei tak a lo khelh tawhna Chelsea a chhuahsan. A football hun tawp lam hi USA-a Major League Soccer-ah hmang tura ngaih a ni. MLS season a la inṭan si lo a, hun khaihlakah Lampard hi New York City FC neitupa club tho Man City lamin 'loan' hmangin an 'hawh' tih a ni.

Lampard-a loan hun hi a rei lo hle. December 31, 2014-ah khan a tawp. Loan a tawp chuan New York City FC tana inkhel turin USA-a kal mai tura ngaih a ni. Hetihlai hian Manchester City tan a ṭangkaiin Premier League-ah a che ṭha si a, Man City hian a 'loan' chu pawhsei an tum.

Lampard-a 'loan' chu an pawtsei ta nge nge a, tun season tawp thleng Man City lamah a khel ang. Man City hian season ṭan hmaa Lampard an hawh dawn khan, 'MLS lama fit ṭha taka a inkhelh theihna turin Premier League-ah Man City tan 'loan' in a khel dawn,' tih an sawi. He mi hnu hian 'loan' tih ṭawngkam hi City hian official-in an hmang nawn tawh lo a, 'contract' tih vek an hmang.

Loan a lo ni miah lo!

Chelsea chhuahsana New York City FC a pan khan, Lampard hian kum hnih daih contract a ziah thu an puang a, Lampard-a hming chuanna New York City FC jersey-te pawh USA lamah chuan hralh a kal hman hle. Nimahsela tun hnaia Man City tana a khelh dan leh a contract-ah hian Asso­ciated Press lam chuan thil inthup awmin an hria a, an rinhlelh thute an chhuah.

Premier League lamin an han zir chiang ta a, Lampard hian MLS-a khel turin New York City FC nen contract a lo la ziak reng reng lo tih an hmu chhuak! Lampard hian contract chu a ziak ngei a, a ziahna chu City Football Group-ah a ni a, anni hi Man City leh New York City FC neitu Sheikh Mansour-a pawlte an ni.

City Football Group-ah chiah contract a lo nei a, he mi hnu hian Man City tan season tir aṭanga December 31 thleng khel turin 'contract' a ziak a, MLS-a khel tur phei chuan a lo la inziak lut reng reng lo. Tuna a 'loan pawhsei' tih pawh hi a nihna takah chuan loan ni loin contract tho a ni tih an hmuchhuak lehzel.

Lampard-a neitu tan chu City Football Group an ni a, anni hian Man City-ah zawk an khelhtir a, tun season tawp thleng a khel ang. Premier League season a zawh hunah City Football Group hnuaia club pakhat New York City FC-ah a khel chauh ang - hei hi an inrem dan chu a lo ni.

Premier League thu leh hla

Premier League chuan Lampard-a contract an chhui chian hnuah a contract neihna 'club' awm chhun chu Man City a ni ngei tih an finfiah a, chuvangin tuna Man City-a a khelh dan pawh hi loan ni loin contract pangngai a ni.

Premier League thuchhuah chuan, "Frank Lampard hi 2014-15 season tawp thlenga Manchester City FC tana khel tura ziah luh a ni. Premier League chuan he thil hi chhui chiang a, Lampard hian New York City FC-a khel turin City Football Group kal tlangin eng contract mah a ziak lo," an ti.

Lampard-a chanchin hian New York City FC fans a tithinur a, NYCFC supporter intelkhawm 'The Third Rail' chuan thuchhuah siamin, "Frank Lampard hi Manchester City-ah ni lo, New York City Football Club-ah a khel ngei dawna ngaiin fans tam takin season ticket-te leiin an lo inpuahchah a, hetiang thil a thleng hi kan thinur takzet a ni," an ti!

Thil awm dan

Lampard hian Chelsea a chhuahsan chiah khan contract a ziak a, chu chu City Football Group-ah a ni. He group neitupa hi Manchester City leh New York City FC neitu Sheikh Mansour a ni a, ani hian Lampard hi a 'lei' a ni ber a, a club khawi emaw zawk zawka khel thei turin hlawh a pe.

Hei hi mipui hriatah chuan 'thup' a ni. Chelsea fans hriat dan chuan 'England chhuahsanin USA-ah a inkhel dawn,' tih a ni a, Chelsea chhuahsan mah se ram danga a pêm dawn avangin Lampard hi an ngaidam thei. New York City FC fans hriat dan pawhin, "Kan khaw club-ah Lampard a lo kal dawn," tih a ni a, an phûr hle.

A tak ramah erawh Lampard hian City Football Group-ah chiah contract a lo ziak a, anni rawtna angin Man City lamah a khel a, New York City-ah phei chuan contract a lo ziak reng reng lo chu niin!

MLS deputy commissioner Mark Abbott chuan, "Lampard hian tunah chuan Premier League-a khel turin Man City-ah contract a nei. City Football Group nen hian inremna neiin Man City lama a contract a zawh hunah MLS-a New York City tan a khel leh dawn a, MLS-ah contract a ziak ve leh dawn a ni," a ti.

Fans a bum em?

Chelsea 'hero' Frank Lampard hian a hun tawp lamah Chelsea chhuahsanin Manchester City zawm ta se, Chelsea fans-in an ngamdam thei miah lo ang. An elpui club-a kal lo a, USA-a kal tur anga insawi zet chunga Man City-ah tho 'contract' a lo nei leh reng hi Chelsea fans tan chuan a na hle ang.

New York City fans lam tan pawh Lampard-a transfer an kalpui dan hi a thinurthlak ngei ang. He club fan-te hian Lampard hi an lei ngeia ngaiin nghakhlel takin an lo thlir a, a kawrte hian an lo lei tawh a, tunah Man City-ah chiah contract a lo nei tih an hriat rual hian 'inbumna' awmin an hre ngei ang.