Arsene Wenger demtu Podolski

Inter Milan-a kal ta Lukas Podolski chuan Arsenal manager Arsene Wenger chu amah zah loah puhin an inṭhen dawn pawhin ṭawngkam ṭhain a thlah loh thu a sawi chhuak.

Germany international player ve meuh si hi tun season-ah Wenger hian Premier League-ah starting eleven-ah a dah lo a, a khelh khat bakah a khelh chhunah pawh a khel rei ngai lo. Season kal meklaiin Podolski hian chhuah a duh thu a sawi thawi fo a, Inter lamah loan-in a kal a, season tawpah transfer pangngaia a chhuah rin a ni.

Podolski chuan, "Engtin mah min thlah lo. Min be lo a, 'mangṭha' takngial pawh min ti lo. Ani hnen aṭang hian inthlahna pangpar emaw inthlah tura infawh emaw ka phût lo a; nimahsela inzah taka inthlah ve hi ka lo beisei a, kei chuan inzah tawnna hi ka dah pawimawh a ni. Arsenal tan ka theihna zawng zawngin ka khel a, tihsual ka neih ka hre lo," a ti a, a lawm lo hle.

Podolski chuan Inter Milan boss Roberto Mancini nen ṭha taka an inkawm thu sawiin, "Ka inkhel mang lo chunga Inter-in chance ṭha min hawnsak hi ka lawm a, Mancini nen ṭha takin kan inkawm a, chuvangin he hmuna lo kal hi ka tan chuan thutlukna awlsam tak a ni," a ti a; a khelh duhna sawiin a laia khelh chu a duh dan ber a nih rualin manager thu thua awm a tum thu a sawi.